Shkroi: Fatbardh Dema
Mediat online si “Euronews Albania”, “TV21”, “Botasotere.com” e “Telegrami Sot”, në faqet zyrtare në Facebook, kanë publikuar video e imazhe nëpërmjet të cilave pretendohet se paraqesin pamje të qytetit rus Kamchatka, ku duket se bora ka arritur nivelin e ndërtesave e disa prej tyre edhe i ka mbuluar.
Çka nuk shkon me këto pamje?
Pas verifikimit të fakteve, hibrid.info vërtetoi se pamjet nuk janë reale dhe se janë gjeneruar përmes inteligjencës artificiale (IA).
VERIFIKIMI I FAKTEVE
Hibrid.info duke përdorur platformën për verifikim të imazheve e videove “Hivemoderation.com”, ka vërtetuar se video-materiali i publikuar nga “TV21” e “Telegrami sot” është i gjeneruar 99% nga IA.
Postimet nga TV21 e Telegrami Sot
Verifikimi nga Hivemoderation.com
Ndërsa edhe videoja tjetër e publikuar nga Euronews Albania, që shfaq pamje të borës që ka arritur deri në gjysmën e lartësisë së ndërtesave në Kamchatka, ka rezultuar të jetë gjeneruar 99% me inteligjencë artificiale.
Postimi nga Euronews Albania
Verifikimi nga Hivemoderation.com
Faqja e portali “Bota sot e re” ka publikuar një imazh përmes të cilit pretendon se paraqet pamje të borës në Kamchatka, e që arrin në nivel deri në 10 metra. Pas verifikimit të fakteve, u vërtetua se edhe kjo përmbajtje u gjenerua 99% nga IA.
Postimi nga Bota Sot e Re
Verifikimi nga Hivemoderation.com
Pas hulumtimit të kryer online, hibrid.info ka gjetur se këto përmbajtje janë publikuar edhe nga disa faqe në Facebook si “Realiteti”, “Albanian News”, “Mexhlis”, “Prishtina Online” “FlashNews.mk” e “Shprehu 02”.
Hibrid.info ka hulumtuar përmes “Google” lidhur me raportimet për reshje bore në qytetin rus Kamchatka. Mediumi turk, shërbimi në shqip “TRT Balkan Albanian”, kishte raportuar lidhur me reshjet në këtë qytet rus, me pamjet që kanë treguar se “reshjet e borës në Petropavlovsk-Kamchatsky kanë tejkaluar 3 metra”.
Duke u bazuar në kohën e publikimit të këtyre përmbajtjeve në internet, hibrid.info ka gjetur se ato fillimisht u postuan në TikTok nga llogaria me emrin “Cupcake videos”.
Analiza
Në median sociale Facebook, media online e faqe janë publikuar imazhe e video, përmes të cilave pretendohet se paraqesin pamje të qytetin rus Kamchatka, ku shihet se bora ka shkuar në nivel deri 10 metra, e në disa raste ka mbuluar edhe ndërtesat.
Pas verifikimit të këtyre përmbajtjeve, u vërtetua se ato nuk janë reale. Duke u bazuar në verifikimin e platformës “Hive Moderation”, del që këto përmbajtje janë gjeneruar 99% me inteligjencë artificiale.
Bazuar në metodologjinë e punës, hibrid.info i vlerëson këto përmbajtje si “Përmbajtje të paverifikuara”.
Arsyetimi
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.