Portali i dyshimtë në gjuhën shqipe “todaykhobor.com” ka publikuar një artikull me titull “Avdullah Hoti: Unë hapa vende pune për rini, ndërsa Albini shkon në Shqipëri për pushime!!”.
Nga procesi i kontrollit të fakteve, të kryer nga hibrid.info, rezulton që artikulli të përmbajë titull të rremë që nuk i përgjigjet përmbajtjes së tekstit. Gjithashtu, edhe lajmi është i rremë, në të cilin gjendet një deklaratë e sajuar nga ky portal i dyshimtë, gjoja është bërë nga Hoti, e cila nuk përputhet me titullin.
Hibrid.info gjatë kërkimit të kryer përmes makinave të kërkimit dhe rrjeteve sociale, nuk ka arritur të gjejë ndonjë deklaratë të tillë të bërë nga Hoti në asnjë nga mediumet kredibile në vendin tonë.
Teksti i artikullit të publikuar në portalin e dyshimtë “todaykhobor.com”:
Hoti: “Rinia duhet me punu edhe per 150 euro, me i kontribu shtetit se fajet i keni ju që..” Kryeministri i Kosoves, Avdullah Hoti ka kritikuar rinin e Kosoves mbreme ne nje interviste qe pati per televizionet kosovare. Ne kete interviste ai u shprehe se rinia kosovare s’po punojn.. “Rinia e Kosoves nuk po punon hiq. Ata duhet me punu edhe per 150 euro me i kontribu shtetit.”
Vegëza e artikullit të publikuar në portalin e dyshimtë “todaykhobor.com”:
Analiza:
Portali i dyshimtë “todaykhobor.com” ka krijuar një artikull me përmbajtje e titull të rremë, të cilat nuk korrespondojnë mes vete. Hibrid.info gjatë kërkimit dhe hulumtimit të bërë, nuk ka gjetur asnjë nga këto deklarata të bëra nga Hoti për ndonjë medium kredibil.
Pas analizës së kontrollit të fakteve, hibrid.info e ka vlerësuar këtë artikull si “lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
