Përmes një postimi në Facebook, mediumi britanik “The Independent” ka publikuar një përmbajtje për Listën e Studentëve në Serbi, duke përdorur fotografinë e Bibliotekës Kombëtare të Kosovës në Prishtinë.
Në përshkrimin e postimit në Facebook thuhet se Lista e Studentëve ende nuk ka emëruar një udhëheqës, ndërsa ky është vetëm fillimi i çështjeve urgjente që duhet t’i zgjidhë.
Ndërkaq, në fotografinë e publikuar bashkë me artikullin shfaqet titulli: “Serbia’s students won the election. Now they must navigate Russia and frayed EU relations” (Studentët e Serbisë fituan zgjedhjet. Tani duhet të përballen me Rusinë dhe marrëdhëniet e tensionuara me BE-në).
Çka nuk shkon me këtë përmbajtje?
Verifikimi përmes platformës Getty Images tregon se fotografia paraqet Bibliotekën Kombëtare të Kosovës dhe Katedralen e Krishtit Shpëtimtar në Prishtinë.
Përshkrimi origjinal i fotografisë në këtë platformë e përcakton qartë vendndodhjen e saj në Kosovë (shih këtu).
Në brendësi të artikullit, e njëjta fotografi shoqërohet me përshkrimin: “Lista e Studentëve pohon se Kosova mbetet pjesë integrale e Serbisë”, i ndjekur nga shënimi për autorësinë e fotografisë nga Getty Images.
Kështu, fotografia e një objekti në Prishtinë përdoret në një artikull për zhvillimet politike në Serbi dhe shoqërohet me një përshkrim që i referohet pretendimit të Listës së Studentëve për Kosovën.
Përdorimi i saj në këtë kontekst mund të krijojë paqartësi për lexuesit lidhur me vendndodhjen e objektit të paraqitur në fotografi.
Analiza
Përmes një postimi në Facebook, mediumi britanik “The Independent” ka publikuar një artikull për zhvillimet politike në Serbi, duke përdorur fotografinë e Bibliotekës Kombëtare të Kosovës në Prishtinë.
Në brendësi të artikullit, fotografia shoqërohet me përshkrimin se Lista e Studentëve pretendon që Kosova mbetet pjesë integrale e Serbisë. Verifikimi në Getty Images konfirmon se fotografia paraqet Bibliotekën Kombëtare të Kosovës dhe Katedralen e Krishtit Shpëtimtar në Prishtinë.
Bazuar në metodologjinë e punës, hibrid.info e vlerëson këtë përmbajtje si “Gabim”.
Arsyetimi
Vlerësimin “Gabim” e marrin përmbajtjet informative në të cilat, gjatë procesit të përpilimit apo publikimit, paraqiten gabime duke publikuar informacion të pasaktë (sidomos kur kemi të bëjmë me informacione në shifra) ose duke transmetuar lajme të pavërtetuara mirë, pa qëllimin e qartë të dezinformimit të publikut.