Shkroi: Fatbardh Dema
Të martën (9 shtator), Kosova U21 luajti kundër Spanjës U21 në “Fadil Vokrri” në kuadër të kualifikimeve për Evropianin U21 të vitit 2027, ndeshje e cila u mbyll me fitoren e mysafirëve (1-3).
Por, ishte paralajmërimi i Federatës Spanjolle të Futbollit (RFEF) për këtë ndeshje që ngjalli pakënaqësi dhe reagime në opinionin tonë.
Kjo, pasi RFEF, Republikës së Kosovës iu referua si “Territor i Kosovës”. (shih këtu)
Ndaj kësaj reagoi edhe Federata e Futbollit e Kosovës (FFK), duke i dërguar një letër presidentit të UEFA-s, Aleksander Çeferin, dhe presidentit të RFEF-së, Rafael Louzan. Aty ka paraqitur notë proteste ndaj asaj që u cilësua si “veprim i papranueshëm i Federatës Spanjolle të Futbollit”.
Çka ndodhi në ndërkohë?
Veprimi i Federatës Spanjolle bëri që rrjetet sociale të mbushen me postime e komente nga më të ndryshmet.
Ishte një faqe në rrjetin social X ajo që bëri një postim duke i uruar mirëseardhje në Kosovë ekipit spanjoll, por që këtij të fundit iu referua me një emër tjetër. Faqja “Kosovan Football”, Spanjës iu referua me emrin Al-Andalus.
Por, disa media në gjuhën spanjolle, kësaj faqeje në X iu referuan si “faqe zyrtare e FFK-së”, gjë që nuk qëndron.
Sipas asaj që shihet në ueb-faqen zyrtare të FFK-së, del se faqja zyrtare e federatës sonë të futbollit në X është FFK, gjë që theksohet edhe te përshkrimi i saj, “Federata e Futbollit e Kosovës – profili zyrtar në X”.
Çka është faqja “Kosovan Football”?
Profili “Kosovan Football” në X, në përshkrimin që e ka brenda, askund nuk thotë se është faqe zyrtare e FFK-së. Madje nga vetë emaili që kanë vënë në dispozicion për komunikim, kosovanfooty@gmail.com, shihet se nuk kemi të bëjmë me një faqe zyrtare të FFK-së, pasi emailet e FFK-së përfundojnë me domainin “ffk-kosova.com” (info@ffk-kosova.com). Pra, ky profil është hapur për Kombëtaren e Kosovës, mirëpo nuk është profil zyrtar i FFK-së.
Çka raportuan mediat në gjuhën spanjolle?
Faqet në gjuhën spanjolle, si “mundodeportivo” dhe “latercera”, këtij profili i janë referuar si faqe zyrtare e FFK-së.
“Veç kësaj, përmes llogarisë së saj zyrtare në gjuhën angleze në rrjetin social X, FFK-ja e quajti Spanjën ‘ish Al-Andalus’. ‘I dëshirojmë mirëseardhje të ngrohtë territorit të ish Al-Andalusit në Republikën e Kosovës’, postuan ata”, shkruan në tekstin e medias “Mundo Deportivo”.
Ngjashëm ka raportuar edhe media tjetër, “La Tercera”, e cila po ashtu, postimit të “Kosovan Football” i është referuar si postim i faqes zyrtare të FFK-së.
Pse Al-Andalus?
Emërtimi “Al-Andalus” përdoret për të përshkruar periudhën historike kur pjesë të Spanjës ishin të pushtuara nga myslimanët (arabët dhe berberët), nga viti 711 deri në fund të shekullit të 15-të. Ky rajon quhej “Al-Andalus” dhe përfshinte pjesë të mëdha të Spanjës dhe Portugalisë së sotme. Pushtimi dhe sundimi i këtij territori nga myslimanët solli zhvillim të rëndësishëm në fushat e kulturës, shkencës dhe arkitekturës.
Analiza:
Më 9 shtator, disa mediume në gjuhën spanjolle raportuan se profili zyrtar i FFK-së në X, Spanjën e ka quajtur “Al-Andalus”.
Pas verifikimit nga hibrid.info, u konstatua se pretendimi nuk është i vërtetë. Kjo për shkak se faqja “Kosovan Football”, të cilës i janë referuar mediat në Spanjë, nuk është faqe zyrtare, por një faqe e hapur për Kombëtaren e Kosovës në futboll.
Gjithashtu, hibrid.info ka kërkuarën të gjitha profilet zyrtare të FFK-së, dhe askund nuk ka gjetur se federata jonë e futbollit i është referuar Spanjës me emërtimin “Al-Andalus”.
Prandaj, bazuar në metodologjinë e punës, hibrid.info e vlerëson këtë pretendim si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.