Është publikuar një imazh ku shfaqet Hysni Gucati, kreu i organizatës së veteranëve të luftës së Ushtrisë Çlirimtare të Kosovës (UÇK), i cili teksa mbante një fjalim para protestuesve, mbante një revole të fshehur mbrapa shpinës.
Përmbajtja është gjetur e publikuar të dielën (20 shtator) në TikTok nga një llogari me emrin “realiteti_me_albinkurti4”.
Çka nuk shkon me përmbajtjen?
Ky imazh është i manipuluar.
Në bazë të fakteve që shihen në imazhin e dërguar nga lexuesit, vërehet se përmbajtja fillimisht është publikuar në Facebook nga llogaria me emrin “Luftari Spartak”.
Megjithatë, pas kontrollit në këtë llogari, postimi në fjalë nuk u gjet (shih këtu).
Hibrid.info më pas kontrolloi në llogarinë e Gucatit në Facebook. Në postimet e tij u gjet një publikim, ku ai kishte sqarua tekstualisht dhe vizualisht se përmbajtja në fjalë ishte e manipuluar (shih këtu).
Imazhi është shkrepur më 19 shtator, gjatë protestës së organizuar nga veteranët e UÇK-së kundër vendimit të shkallës së parë të Dhomave të Specializuara të Kosovës në Hagë ndaj ish-krerëve të UÇK-së.
Gucati u ishte drejtuar të pranishmve me fjalim (shih këtu).
Hibrid.info hulumtoi dhe gjeti video-materialin e protestës së publikuar në kanalin zyrtar të televizionit “Kanal 10” në Youtube (shih këtu). Në pamjet e fjalimit të Gucatit, vërehet se ai gjatë gjithë kohës, sa i drejtohet masës, ka mbajtur duart përpara (shih këtu).
Përveç kësaj, edhe analiza nëpërmjet “HiveModeration.com”, vegla online për detektimin e përmbajtjeve të gjeneruara nga inteligjenca artificiale (IA), ka shfaqur rezultatet (87,4%) që tregojnë gjasa të mëdha qe ky imazh të jetë i gjeneruar nga kjo teknologji.
Analiza
Imazhi ku pretendohet se Hysni Gucati, gjatë fjalimit në protestën e veteranëve të UÇK-së, mbante një revole të fshehur pas shpinës, është i manipuluar.
Pamjet autentike nga protesta tregojnë se Gucati, gjatë fjalimit, i mbante duart përpara dhe nuk shihet duke mbajtur revole pas shpinës.
Përveç kësaj, analiza e imazhit përmes “HiveModeration.com”, një vegël online për detektimin e përmbajtjeve të gjeneruara nga inteligjenca artificiale (IA), ka treguar një probabilitet të lartë që imazhi të jetë gjeneruar ose modifikuar përmes kësaj teknologjie.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.