Portali informativ “Jepize.com” dje (31 korrik) ka publikuar një artikull me titull “Zyrtare: Mbyllen kufijtë e Kosovës, gjendje alarmante”.
Pas verifikimit të fakteve, hibrid.info ka vërtetuar se ky artikull përmban titull jo adekuat, i cili nuk përputhet me përmbajtjen.
Në përmbajtje gjendet njoftimi zyrtar nga Policia e Kosovës për mbylljen e dy pikë-kalimeve kufitare, Bërnjak e Jarinjë për qarkullim të udhëtarëve me automjete.
Ndërsa në titull nuk qartësohet se bëhet fjalë vetëm për këto pikë-kalime kufitare, duke lënë të kuptohet se janë mbyllur të gjithë kufijtë e vendit.
Vegëza e artikullit të publikuar në portalin “Jepize.com”:
Njoftimi i Policisë së Kosovës për mbylljen e pikë kalimeve kufitare në Bërnjak dhe Jarinjë:
INFORMACION ZYRTAR (nr.1)
Prishtinë, 31 korrik 2022
Policia e Kosovës ka mbyllur kufirin për qarkullim udhëtar dhe për automjete në pikë kalimet kufitare Bernjak dhe Jarinje, për shkak të bllokimit të rrugëve në drejtim të këtyre pikë kalimeve kufitare Jarinje dhe Bernjak.
Njoftohen të gjithë qytetarët të shfrytëzojnë pikat tjera kufitare për qarkullim. (shih këtu)
Ky artikull me titull jo adekuat është shpërndarë edhe nga disa portale të dyshimta, të cilat e kanë cituar portalin “Jepize.com”. (shih këtu, këtu, këtu, këtu dhe këtu)
Analiza:
Portali “Jepize.com” dje (31 korrik) ka publikuar njoftimin e Policisë së Kosovës për mbylljen e pikë kalimeve kufitare në Jarinjë dhe Bërnjak, ndërsa këtij artikulli i ka vënë titull jo adekuat “Zyrtare: Mbyllen kufijtë e Kosovës, gjendje alarmante”.
Me këtë titull lë të kuptohet se janë mbyllur të gjithë kufijtë e Kosovës, duke mos qartësuar se bëhet fjalë vetëm për këto dy pikë-kalime kufitare.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
