Shkroi: Etrit Rexhepi
Sipas Hysen Durmishit, zëvendësministër i Infrastrukturës, pas reshjeve të dëborës në Kosovë, të gjitha rrugët që janë përgjegjësi e ministrisë, janë të hapura.
Kjo u potencua sot (25 dhjetor) në një status të publikuar në llogarinë e tij në Facebook.
Po ashtu, edhe në një komunikatë të publikuar më 24 dhjetor, në faqen e MI-së, potencohet kalueshmëria në të gjitha rrugët.
Çka nuk shkon me deklarimet?
Hibrid.info ka gjetur se njëra nga rrugët që mirëmbahet nga Ministria e Infrastrukturës, është pjesërisht e kalueshme.
Analiza:
Në faqen e Ministrisë së Punëve të Brendshme, nga organizata qeveritare Qendra Kombëtare për Menaxhim Kufitar, te rubrika “Gjendja e Rrugëve”, tregohet se rruga Pejë – Kullë, që shpie në pikëkalimin kufitar me Malin e Zi, është e pakalueshme për mjete të rënda (kamionë). Ndërkaq, theksohet se për automjetet e udhëtarëve, të domosdoshme janë pajisjet dimërore.
Cilat rrugë menaxhohen nga Ministria e Infrastrukturës?
Hibrid.info ka gjetur se Departamenti i Menaxhimit të Rrugëve, që funksionon në kuadër të Ministrisë së Infrastrukturës, menaxhon me autostradat, rrugët nacionale dhe ato rajonale/regjionale.
Në bazë të hartës së rrugëve, konfirmohet se rruga në fjalë, Pejë-Kullë, është rrugë rajonale/regjionale. Që do të thotë se mirëmbajtja e kësaj rruge është përgjegjësi e institucioneve qendrore, dhe jo e atyre lokale (komunale).
Gjatë kërkimit, janë gjetur edhe artikuj të publikuar para dy dite nga media në gjuhën shqipe, ku është njoftuar për bllokimin e kësaj rruge (shih këtu dhe këtu).
Përfundimi:
Pretendimi i zëvendësministrit të Infrastrukturës, Hysen Durmishi, se të gjitha rrugët të cilat menaxhohen nga kjo ministri, janë ta kalueshme pas reshjeve të borës, nuk është plotësisht i vërtetë.
Në bazë të të dhënave të qasshme online, hibrid.info ka gjetur se aktualisht rruga rajonale/regjionale Pejë – Kullë, është e pakalueshme për automjetet e rënda (kamionë).
Bazuar në metodologjinë e punës mbi kategorinë e vërtetësisë, kjo deklaratë e zëvendësministrit Durmishi vlerësohet si “deklaratë gjysmë e vërtetë”.
Arsyetimi:
Në kategorinë e vërtetësisë, vlerësohen ato deklarata që përmbajnë thënie që lidhen me fakte objektive, saktësia e të cilave mund të përcaktohet me anë të verifikimit objektiv. Deklaratat e trajtuara në këtë kategori marrin vlerësimin – deklaratë e pavërtetë, gjysmë e vërtetë, apo edhe deklaratë e vërtetë.