Faqja në Facebook me emrin “Lexo Sot”, ka publikuar sot (22 dhjetor) një artikull me titull “MINUTA E FUNDIT/ Vuçiqit i vjen nje “goditje” tronditese qe nuk e priste, serbet ne veri duke e fyer ate (VIDEO)”.
Pas verifikimit të fakteve të kryer nga hibrid.info, është vërtetuar se ky artikull është i vjetër, i publikuar më 2 tetor të vitit 2021.
Kjo faqe është munduar ta paraqesë si aktual këtë artikull të vjetër, duke i bashkangjitur cilësimin si “MINUTA E FUNDIT”.
Hibrid.info ka arritur të vërtetojë se përmbajtja e këtij artikulli është e vjetër dhe ka të bëjë me ngjarjen e tetorit të vitit 2021, atëkohë kur pika kufitare në Jarinjë ishte bllokuar nga serbët lokalë prej 20 shtatorit 2021, si pasojë e vendimit të Qeverisë së Kosovës për masë reciprociteti në targat e makinave të regjistruara në Serbi. (shih këtu)
Vegëza e artikullit të publikuar në Facebook nga faqja “Lexo Sot”, e cila numëron mbi 40 mijë ndjekës:
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar në kohë reale (2 tetor 2021) në portalin e televizionit Klan Kosova, “KlanKosova.tv”. (shih këtu)
Analiza:
Faqja në Facebook “Lexo Sot” ka publikuar artikull të vjetër të vitit 2021, të cilin është munduar ta paraqesë si aktual, duke shtuar në titull fjalinë “MINUTA E FUNDIT”.
Pas verifikimit të fakteve, bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.