Portali i dyshimtë me përmbajtje në gjuhën shqipe “albasky.com” ka publikuar një artikull me titull “Lista Srpska: Kosova është e Serbisë dhe qeverinë e rrëzojmë kur të dojmë”.
Pas verifikimit të fakteve të kryer nga hibrid.info, është vërtetuar se titulli i këtij artikulli është i sajuar, i cili nuk përputhet me përmbajtjen.
Në përmbajtje gjendet një lajm i vjetër i muajit nëntor 2020, atëkohë kur Lista Serbe kishte përkahur rrëzimin e Qeverisë Hoti.
Pra, nuk ka asgjë të vërtetë se Lista Serbe ka thënë që “Kosova është e Serbisë dhe qeverinë e rrëzojmë kur të dojmë”, siç pretendohet rrejshëm në titullin e këtij artikulli.
Artikulli i publikuar në portalin e dyshimtë “albasky.com”:
Ky artikull me titull të rremë është shpërndarë edhe në Facebook nga faqja “Gazeta Aktive”, e cila në këtë postim ka arritur të grumbullojë numër të madh komentesh e reagimesh. (shih këtu)
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar në kohë reale (11 nëntor 2020) në portalin “Indeksonline.net”. (shih këtu)
Analiza:
“Albasky.com” ka publikuar një artikull të vjetër të muajit nëntor 2020, të cilin është munduar ta paraqesë si aktual, duke i vënë titull të rremë.
Bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.