Artikulli me përmbajtje keqinformuese nga mediumi Kurir.rs u korrigjua pas trajtimit nga hibrid.info (shih artikullin e korrigjuar këtu)
Disa media serbe dje (06 shtator) kanë publikuar artikull me pretendim se po sulmohen fëmijët e Milan Radojçiqit, nënkryetarit të partisë serbe “Lista Serbe (Srpska Lista)” nga, siç thuhet, mediat e kontrolluara nga Albin Kurtin, me arsyetimin se janë fotografuar me kryeministren e Serbisë, Ana Bërnabiq. (shih këtu, këtu, këtu dhe këtu)
Pretendimet e mediave serbe bazohen në një reagim të subjektit politik të komunitetit serb në Kosovë, “Lista Serbe” (Srpska Lista), të publikuar dje (6 shtator), në faqen e tyre në Facebook. Përmes këtij reagimi, ky subjekt politik ka pretenduar se fëmijët e Milan Radojçiqit janë në shënjestër të, siç shprehën, mediave të kontrolluara nga Kurti, duke e vlerësuar këtë si një vazhdimësi e persekutimit duke i përfshirë edhe fëmijët e pafajshëm. (shih këtu)
Pjesë të postimi të partisë serbe “Lista Serbe” në Facebook të përkthyer:
Sulmi i mediave shqiptare nën kontrollin e Albin Kurtit ndaj fëmijëve të mitur të Milan Radoiçiqit, nënkryetarit të Listës Srpska, është vazhdimësi e përndjekjes dhe synimit të fëmijëve të pafajshëm, e cila është e paligjshme dhe e papranueshme.
Pas gjithë gënjeshtrave, shpifjeve dhe gjyqeve të inskenuara kundër nënkryetarit tonë Radoiçiq, Prishtina tani synon edhe fëmijët e mitur dhe të pafajshëm sepse mbajnë mbiemrin Radoiçiq.
Pas publikimi të këtij reagimi të Listës Serbe nga disa mediume në gjuhën serbe në Serbi, lidhur me këtë pretendim është prononcuar edhe Shefi i Zyrës për Kosovën në Qeverinë e Serbisë, Petar Petkoviq. Në një postim në profilin e tij në Facebook të bërë dje (6 shtator), ai u shpreh në mbështetje të këtij pretendimi. (shih këtu)
Në fakt, i gjithë pretendimi i Listës Serbe për, siç kanë aluduar, shënjestërimin e mediave “të kontrolluara nga Albin Kurti” ndaj fëmijëve të Milan Radojçiqit, nuk përcillet me ndonjë fakt mbështetës. Pra, në reagimin e tyre zyrtar, të publikuar përmes faqes në Facebook, nuk jepen fakte se po synohet një sulm i tillë, i pretenduar nga partia serbe dhe nuk jepen detaje rreth asaj që aludohet.
Në postim nuk jepen detaje rreth mediave për të cilat aludon partia serbe se po e shënjestërojnë familjen e Milan Radojçiq-it.
Përveç kësaj, hedhet edhe një pretendim tjetër i pabazuar, siç është ai për afërsinë e disa mediave me kryeministrin Kurti, të quajtura si “media të kontrolluara nga Kurti”. Por, në fakt, edhe për këtë pretendim, ky subjekt politik nuk ofron ndonjë të dhënë kredibile që do ta argumentonte afërsinë e ndonjë mediumi kosovar me figurën politike të Kurtit.
Analiza:
Mediat serbe të afërta me pushtetin atje (shih këtu) kanë publikuar pretendime të pabaza se mediat e Albin Kurtit kanë vënë në shënjestër familjen e nënkryetarit të partisë serbe “Lista Serbe (Srpska Lista)” Milan Radojçiq, duke e interpretuar si vazhdimësi e persekutimit të serbëve. Pretendimet bazohen në një postim të subjekt politik “Lista Serbe” e cila i hedh këto pretendime pa dhënë detaje e fakte për të.
Ndërsa edhe për pretendimin e ekzistimit të “mediave të kontrolluara nga Kurti”, ky subjekt politik serb nuk jep ndonjë evidencë apo dokument kredibil që do të shërbente për ta dëshmuar një gjë të tillë.
Hibrid.info në bazë të verifikimit të fakteve vlerëson se këto pretendime janë të pabaza, mbështetur në atë se nuk ofrojnë fakte rreth saj, dhe vlerësohen si të “Pa verifikuara”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
