Portali i dyshimtë “specialja.com” ka publikuar një artikull me titull “Bëri vaksinen kundër koronavirusit, Pëllumb Pipero: Ndoshta viking nuk bëhetni por pas nji viti ju ndodh më e keqja”.
Doktori shqiptar, Pëllumb Pipero dje (11 janar) pasi kishte marrë dozën e parë të vaksinës kundër virusit Korona dha një deklaratë për opinionin shqiptar rreth efekteve anësore që mund të ketë pas marrjes së vaksinës.
Ai deklaroi se përgjithësisht, efektet anësore të kësaj vaksine janë të vogla:
“Të paktën ato që njohim, efektet anësore afatshkurtra. Nuk kemi dijeni ende për efekte anësore afatgjata, sepse vaksina është relativisht e re. Bëhet fjalë për dhimbje, për skuqje, ndonjëherë të përziera, të vjella, por që unë nuk i pata. As personat që janë vaksinuar deri tani nuk i kanë pasur”.
Pas analizës së kontrollit të fakteve nga hibrid.info. del që në asnjë rast Pipero nuk ka thënë se, pas një viti do ju ndodhë më e keqja, siç pretendohet në titullin e artikullit të publikuar nga “specialja.com”.
Vegëza e artikullit të publikuar nga “specialja.com”:
Më poshtë mund të gjeni videon autentike me deklaratën e plotë të Piperos dhënë për emisionin “Rudina” në televizionin Klan të Shqipërisë:
Analiza:
Portali i dyshimtë “specialja.com” ka marrë deklaratën e doktorit shqiptar, të cilës më pas i ka vënë titull të rremë. Duke e ditur se ky portal numëron afër 80 mijë ndjekës në rrjetin social Facebook, atëherë gjasat janë shumë të mëdha që lexuesit të dezinformohen rreth efekteve anësore pas marrjes së vaksinën anti-covid. Pas verifikimit të kryer nga hibrid.info, del që ky shkrim kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
