Portali i dyshimtë me përmbajtje në gjuhën shqipe “Pronews20.com” sot (7 shtator) ka publikuar një artikull me titull “Lajm i mire , fillon mesimi injorohet SBASHKU”.
Pas verifikimit të fakteve në artikull, hibrid.info ka vërtetuar se titulli është i sajuar, që nuk i përgjigjet përmbajtjes.
Në përmbajtje, në fakt, gjendet një artikull i publikuar dje (6 shtator) nga portali i televizionit Klan Kosova, në të cilin thuhet se mësimdhënësit në Busavatë e Karaçevë të Poshtme, të komunës së Kamenicës, kanë marrë vendim të dalin nga greva.
Ndërsa titulli në artikullin e vendosur nga portali i dyshimtë “pronews20.com”, duke qenë përgjithësues, mund të kuptohet se mësimi ka filluar në të gjithë vendin, pa e qartësuar se bëhet fjalë vetëm për shkollën në Busavatë.
Vegëza e artikullit të publikuar në portalin e dyshimtë “pronews20.com”:
Ky artikull është shpërndarë edhe në rrjetin social Facebook nga faqet si “Post Lajme” dhe “Post Lajmee”.
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar nga portali “Klankosova.tv”, i cili mban titullin “’Busavata e nisi mësimin, “e pavarur’”. (shih këtu)
Për ta qartësuar edhe më shumë faktin se greva në arsim është duke vazhduar, kryetari i SBASHK-ut, Rrahman Jashari, dje (6 shtator) ka deklaruar për portalin “GazetaBlic.com” se greva në arsim do të vazhdojë deri në një afat të pacaktuar, nëse nuk ka lëvizje nga ana e Qeverisë. (shih këtu)
“Për sa i takon komunikimit dhe takimeve me Qeverinë, nuk ka ndodhur, jemi në pritje që të ndodhin. Nëse kështu vazhdohet, atëherë nga ajo që dihet pra nga raportet që kemi si nga sektori i arsimit dhe ai i shërbyesve civilë, greva është unike dhe vazhdon dhe e tillë do të jetë edhe në ditët në vazhdim nëse nuk ulemi të bisedojmë për të bërë zgjidhje”, ka deklaruar ndër të tjerash Jashari për “GazetaBlic.com”.
Analiza:
Portali i dyshimtë “Pronews20.com” ka publikuar një artikull të mediumit online “KlanKosova.tv” që flet për daljen nga greva të mësimdhënësve në disa shkolla në Kamenicë, më saktësisht në Busavatë e Karaçevë të Poshtme.
Mirëpo, këtij artikulli i është vënë titull i pasaktë nga portali i dyshimtë “Pronews20”, duke lënë të kuptohet se mësimi ka filluar në të gjithë vendin.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
