Disa media në gjuhën serbe kanë publikuar dje (20 dhjetor) artikuj me pretendimin se kryeministri i Kosovës, Albin Kurti, dëshiron masakër në barrikada, duke kërcënuar me vrasjen e serbëve.
Pretendimet bazohen në një deklaratë të Albin Kurtit dhënë për të përditshmen britanike “The Guardian”.
Tituj e artikujve të publikuara në disa media në gjuhën serbe janë këto: “KURTI DO MASAKRE NË BARIKADA: Kërcënim i drejtpërdrejtë nga Prishtina” , “KURTI SHPALL GJAKDERDHJE! Shiptari kërcënon kështu për herë të parë! “Heqja e barrikadave nuk mund të përjashtojë viktimat!” , “Kërcënim I tmerrshëm: Kurti kërkon të vdekur”, “Kurti do të vrasë serbët”.
Vegëzat e artikujve të publikuar në disa media në gjuhën serbe:
https://www.novosti.rs/vesti/politika/1184440/aljbin-kurti-kosovo-metohija-srbi-kim
https://informer.rs/vesti/politika/757837/aljbin-kurti-pristina-provokacija
https://www.alo.rs/vesti/kim/705671/uklanjanje-barikada-ne-moze-iskljuciti-zrtve/vest
Pjesë të artikujve të publikuar në disa media në gjuhën serbe:
Kryeministri i institucioneve të përkohshme në Prishtinë, Albin Kurti dje ka shpalosur qëllimin përfundimtar të politikës destruktive që po zbaton: largimin fizik të serbëve dhe vendosjen e kontrollit të plotë mbi veriun e Kosovës. Për t’i bërë gjërat edhe më të rrezikshme, ai e mbështjell këtë qëllim të rrezikshëm me petkun e luftimit të tentativave të supozuara të Rusisë për të provokuar një luftë në Ballkan, duke akuzuar Beogradin se është gati të ndihmojë Moskën në këtë.
Kërcënimet që Kurti u dërgon bashkatdhetarëve tanë me muaj të tërë kanë marrë formën më të tmerrshme, pasi me deklaratën “se heqja e barrikadave nuk përjashton viktimat”, ai praktikisht paralajmëroi sulmin e serbëve të ardhur në protestë të cilët dolën për të mbrojtur veten nga terrori i Prishtinës dhe për të mbrojtur jetën e tyre.
Këto pretendime kanë zënë vend në ballinat e gazetave “Informer”, “Novosti”, “Alo!”, “Vesti”.
Bazuar në përmbajtjet edhe titujt e disa mediave serbe, bëhen pretendime të pabazuara se kryeministri i Kosovës, Albin Kurti, përmes deklaratës së bërë në intervistën e dhënë për “The Guardian”, ka shpalosur hapur planin e tij për eliminimin fizik të serbëve në barrikadat e vendosura në veri të Kosovës.
Megjithatë, deklarata e Kurtit nuk duket të ketë karakter nxitës për eliminim fizik të serbëve të përfshirë në barrikada, siç pretendohet në disa media në gjuhën serbe.
Kurti në deklaratën bërë për “The Guardian” shprehi shqetësimin se largimi i këtyre barrikadave nuk mund të përjashtoj pasoja (në njerëz).
“Shqetësimi ynë është që largimi i këtyre barrikadave nuk mund t’i përjashtojë pasojat dhe, për këtë arsye, ne duam që të jemi sa më të kujdesshëm që është e mundshme për t’u siguruar që nuk do të ketë destabilizim dhe që paqja relative e siguria të jenë të vendosura. Megjithatë, ne nuk mund ta lejojmë këtë shkelje të ligjshmërisë e të kushtetutshmërisë përgjithmonë, prandaj, po, kjo duhet të marrë fund, herët a vonë”. (këtu)
Në këtë intervistë të Kurtit për “The Guardian” përmend termin në anglisht “Casualties”, duke iu referuar pasojave në njerëz. Nga ajo që është konstatuar përmes hulumtimit të hibrid.info, kuptohet se termi “Casualties” nuk nënkupton vetëm vrasje të njerëzve, por ka një botëkuptim më të gjerë. Pra ky term përfshinë dëme në njerëz nga një ngjarje e caktuar siç mund të jetë lufta, fatkeqësitë natyrore etj, (sqarimi në anglisht nga Oxford Learning Dictionaries).
“Casualties” pra nuk nënkupton vetëm vrasje, siç është interpretuar nga këto media në gjuhën serbe, por ka përfshirje më të gjerë (shih këtu).
Pra, bazuar në deklaratën e Kurtit shohim gatishmërinë për të siguruar që nuk do të ketë destabilizim, dhe se paqja dhe siguria të zënë vend në këtë pjesë. Gjithashtu, në këtë deklaratë Kurti nuk ka potencuar ndonjë plan për vrasje të serbëve, siç thuhet në artikujt e këtyre mediave në gjuhën serbe.
Analiza:
Disa media në gjuhën serbe kanë publikuar artikuj me pretendimin se kryeministri i Kosovës Albin Kurti dëshiron masakër në barrikada duke kërcënuar me vrasjen e serbëve.
Pretendimet bazohen në një deklaratë të Albin Kurtit dhënë për të përditshmen britanike “The Guardian”. Kurti në deklaratën bërë për “The Guardian” shprehi shqetësimin se nga procesi i largimit të këtyre barrikadave, sipas tij, nuk e përjashton mundësinë e pasoja (në njerëz), duke shtuar shohim gatishmërinë për të siguruar që nuk do të ketë destabilizim, dhe se paqja dhe siguria të zënë vend në këtë pjesë.
Hibrid.info, në bazë të metodologjisë së punës, vlerëson se këto pretendime janë “dezinformatë”.
Vlerësimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
