Portali i dyshimtë me përmbajtje në gjuhën shqipe “albasky.com” ka publikuar një artikull me titull të sajuar “LAJMI I FUNDIT- Tërheqja e TRUST-it, vjen lajmi i mirë për qytetarët!”.
Kjo është vërtetuar pas verifikimit të fakteve nga hibrid.info, duke qenë se në përmbajtje të artikullit nuk paraqitet ndonjë lajm i pretenduar nga titulli. Në artikull paraqitet vetëm një opinion i ekonomistit Muhamet Spahiu, i cili për televizionin T7 është shprehur që tërheqja e 20% të trustit pensional do të ndihmonte në zhvillimin e përgjithshëm ekonomik. Nga kontrolli i fakteve rezulton se, nuk ka ndonjë vendim zyrtar për tërheqje të 20 % nga fondet pensionale në Trust.
Vegëza e artikullit të publikuar në portalin e dyshimtë “albasky.com”:
Artikulli i njëjtë është shpërndarë edhe në Facebook nga faqja “Gazeta Aktive”, e cila numëron mbi 90 mijë ndjekës. (shih këtu)
Hibrid.info ka gjetur artikullin autentik të publikuar në portalin “GazetaExpress.com” (shih këtu)
Ndërsa videon e opinionit të ekonomistit Muhamet Spahiu dhënë për T7 lidhur me tërheqjen e 20% të trustit pensional mund ta gjeni këtu nga minuta 17:20.
Analiza:
Portali i dyshimtë “albasky.com” ka publikuar një opinion të ekonomistit Muhamet Spahiu lidhur me tërheqjen e 20% të trustit pensional.
Por, këtij artikulli i është vënë titull i rremë me pretendimin se TRUSTI ka dhënë lajm të mirë për tërheqjen e pensioneve.
Bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.