Disa faqe në Facebook kanë publikuar një imazh me pretendim se pamjet janë aktuale dhe paraqesin ushtarë dhe oficerë izraelitë të zënë robër, të cilët sipas të njëjtit pretendim, janë munduar të avancojnë në Gaza.
Pas verifikimit të fakteve të kryer nga hibrid.info, është vërtetuar se imazhi është i vitit 2013 dhe paraqet forcat izraelite të mbrojtjes në kufirin me Rripin e Gazës, të cilët kishin zbuluar një tunel të ndërtuar nga, siç thuhet “terroristët”.
Vegëza e postimit të publikuar në Facebook nga faqet “SFEFP” dhe “Support For Turkey From Presheva”:
Pas hulumtimit përmes programit të automatizuar “InVID”, hibrid.info ka arritur të gjejë imazhin e njëjtë të publikuar në mediumin “Israele.net” me datë 13 tetor 2013. (shih këtu)
Screenshot i artikullit të publikuar në vitin 2013 nga mediumi “Israele.net”
Pjesë nga artikulli i publikuar nga “Israele.net” në vitin 2013, i përkthyer në shqip:
Tuneli terrorist i zbuluar të enjten e kaluar nga forcat izraelite të mbrojtjes në kufirin me Rripin e Gazës është më shumë se 1.7 km i gjatë, duket jashtëzakonisht i sofistikuar dhe dëshmon për industrinë e lulëzuar që sillet rreth terrorizmit dhe objektivit të pakalueshëm të kryerjes së rrëmbimeve dhe sulmeve ndaj Izraelit.
Analiza:
Disa faqe në Facebook kanë publikuar një fotografi të vitit 2013 në të cilën paraqiten forcat izraelite pas zbulimit të një tuneli të ndërtuar, siç thuhet nga “terroristët”. Me anë të këtij imazhi këto faqe pretendojnë rrejshëm se pamjet janë aktuale dhe paraqesin ushtarë dhe oficerë izraelitë të zënë robër në Gaza.
Bazuar në metodologjinë e punës, hibrid.info e vlerëson këtë postim si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.