Një faqe në Facebook që mban emrin “𝑭𝒍0𝒓𝒓𝒊å𝒏-𝑴å𝒓𝒓𝒌µ”, me datë 3 tetor ka publikuar një video-material me pretendimin se ky boksier shqiptar, përmes një video-paraqitje të drejtpërdrejtë, po e paralajmëron një shpërblim për audiencën.
Në përshkrimin e këtij materiali shkruan “100 personat e parë që thonë (Përshëndetje), do të transferoj 10.000 euro. Kjo eshte e vertete”.
Pas verifikimit të kryer nga Hibrid.info, është vërtetuar se video-materiali është i vjetër, i vitit 2020 dhe nuk ka të bëjë me asnjë lojë shpërblyese të paralajmëruar nga boksieri shqiptar Florian Marku.
Video-materiali i publikuar më 3 tetor 2023 në Facebook nga faqja me emrin “𝑭𝒍0𝒓𝒓𝒊å𝒏-𝑴å𝒓𝒓𝒌µ”:
https://www.facebook.com/61551854738549/videos/1421969981867157
Pas hulumtimit të kryer në mediat sociale, hibrid.info ka arritur të gjejë këtë video-material të realizuar nga Florian Marku, e publikuar në llogarinë e tij personale në Facebook, me datë 15 prill 2020. (shih këtu)
Në këtë video material, boksieri shqiptar kishte flour me komentuesit në një paraqitje të drejtpërdrejtë përmes llogarisë së tij personale në Facebook, ku tregonte se si po i kalonte ditët, në kohën e pandemisë Covid-19.
Vlen të ceket se kjo faqe në Facebook me emrin “𝑭𝒍0𝒓𝒓𝒊å𝒏-𝑴å𝒓𝒓𝒌µ” aktualisht numëron vetëm 85 ndjekës (këtu), por në këtë video material ka arritur të grumbullojë mbi 40 mijë shikime dhe mbi 2 mijë komente. (shih këtu)
Analiza:
Një faqe në Facebook me emrin “𝑭𝒍0𝒓𝒓𝒊å𝒏-𝑴å𝒓𝒓𝒌µ” ka publikuar një video të boksierit shqiptar Florian Marku me pretendimin ta paraqesë atë si thirrje për një aktivitet shpërblyes.
Hibrid.info ka verifikuar faktet e paraqitura dhe ka vërtetuar se video e boksierit të lartcekur është e vitit 2010 në të cilën ai kishte biseduar me komentuesit në një paraqitje të drejtpërdrejtë përmes Facebook, duke sqaruar për mënyrën se si po i kalonte ditët gjatë pandemisë Covid-19.
Bazuar në metodologjinë e punës, hibrid.info e vlerëson këtë video-material të publikuar nga faqja “𝑭𝒍0𝒓𝒓𝒊å𝒏-𝑴å𝒓𝒓𝒌µ”, si “Mashtrim”.
