Disa faqe në Facebook kanë publikuar me datë 12 prill një artikull me titull “Lirohen çmimet e disa artikujve në Kosovë, Ja çmimet e artikujve”.
Pas verifikimit të fakteve, hibrid.info ka vërtetuar se ky artikull është i vjetër, i publikuar me datë 13 mars, atëkohë kur Agjencia e Statistikave të Kosovës (ASK) kishte publikuar raportin e fundit sa i përket lëvizjeve të çmimeve të artikujve bazë brenda javës.
Pra, faqet në Facebook “Feja Ime” dhe “Exclusive Albania Today” janë munduar që këtë artikull të vjetër ta paraqesin si aktual.
Vegëzat e artikullit të publikuar në Facebook nga faqet “Feja Ime” dhe “Exclusive Albania Today”:
Pjesë nga artikulli i publikuar nga faqet e lartcekura:
Derisa para një jave 30 copë vezë kushtonin 4.39 tani ato kushtojnë 4.31 euro, makaronat kushtonin 1.02 euro tani 500 gramë kushtojnë 0.97 euro, ajka kushtonte 1.63 euro tani ka çmim 1.55 euro, detergjenti për enë para një jave ka kushtuar 2.31 euro tani kushton 2.23 euro.
Ndërsa çmimi i artikujve tjerë bazë, nuk ka pësuar ndonjë ndryshim ani pse muajin e fundit ka një rënie të ndjeshme të çmimeve të karburanteve.
Përderisa në artikullin e publikuar çmimi për 30 copa vezë del të jetë 4,39 euro (të datës 13 mars), në tabelën e publikuar së fundmi nga ASK (deri me datë 11 prill) vërehet se çmimi mesatar për 30 copa vezë është 4,03 euro. (shih këtu)
Ndërsa çmimet e produkteve tjera që janë përmendur në artikullin e lartcekur (makaronat, ajka dhe detergjenti për enë) aktualisht kanë pësuar ngritje për disa centë në bazë të publikimeve të fundit të ASK-së. (shih fotografinë më poshtë)
Për ta vërtetuar edhe më shumë faktin se artikulli i publikuar në Facebook nga faqet e lartcekura është i vjetër, hibrid.info ka arritur ta gjejë atë të publikuar me datë 13 mars në portalet informative “EkonomiaOnline.net” dhe “GazetaInfokus.com”.
Analiza:
Në bazë të verifikimit të fakteve, hibrid.info ka vërtetuar se disa faqe në Facebook kanë publikuar raportin e vjetër (mars) të ASK-së për rënien e disa çmimeve të produkteve bazë, me pretendimin që ta paraqesin atë si aktual.
Bazuar në metodologjinë e punës, hibrid.info e vlerëson këtë postim nga këto faqe si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
