Portali që pretendon ta paraqitet si media “fakte.buzz” me 24 Korrik ka publikuar një artikull me titull “Lajm Historik!! “Diaspora shqiptare në protestë! Evropa ta kuptojë se po bën padrejtësi…!”, artikulli i cili është krijuar dhe shpërndarë sot (4 Gusht) nga faqja “Gazeta Parlamenti” në Facebook.
Përmes këtij artikulli, pretendohet rrejshëm se janë ose pritet të organizohen protesta nga Diaspora shqiptare, për të kërkuar liberalizimin e vizave për Kosovën.
Pas verifikimit të artikullit, hibrid.info ka vërtetuar se, sikurse titulli dhe përmbajtja, ashtu edhe imazhi janë të pothuajse të sajuara, të cilat nuk i përgjigjen pretendimit të bërë.
Të gjitha këto komponentë të artikullit janë të huazuara nga ngjarje apo zhvillime të ndryshme, që nuk ndërlidhen me pretendimin e bërë në titull.
Vegëza e artikullit të publikuar në portalin që pretendon të paraqitet si media “fakte.buzz”:
Pjesë nga artikulli i publikuar në “Fakte.buzz”:
Vllasi u shpreh se qytetarët e Kosovës kanë të drejtë të jenë të pakënaqur dhe të protestojnë, por se diaspora shqiptare duhet të protestojë edhe në vendet e BE-së për të treguar pakënaqësi me ruajtjen e regjimit të vizave në Evropë.
“Qytetarët kanë të drejtë që protestojnë, dhe qytetarët e Kosovës në vendet evropiane duhet të organizojnë protesta, të kërkojnë liberalizimin e vizave, sepse nuk ka arsye për mungesën e liberalizimit të vizave për qytetarët e Kosovës. Me angazhimin e institucioneve të Kosovës edhe qytetarët duhet të ndikojnë dhe të protestojnë që Evropa ta kuptojë se po bën padrejtës”, tha Vllasi.
Artikulli i publikuar nga portali që pretendon të paraqitet si media “Fakte.buzz” dhe e krijuar dhe shpërndarë nga faqja në facebook “Gazeta Parlamenti” është i rremë për shkak se përmbajtja dhe fotografia në të cilën bazohet artikulli nuk e përcjellin ngjarjen e pretenduar.
Artikulli bazohet në deklaratat e opinion-bërësit, Azem Vllasi, i cili shpreh një mendim për një të drejtë që Diaspora shqiptare ka të protestojnë dhe të shprehin pakënaqësinë e tyre në Evropë në lidhje me mos liberalizimin e vizave (këtu). Po ashtu, fotografia e përdorur për të ilustruar protestën apo pritjen e një organizimi të një proteste në Evropë, ka të bëjë me një tubim të mbështësve të subjektit politik “Lëvizje BESA” në Maqedoninë e Veriut (këtu), i organizuar në vitin 2016.
Pas hulumtimit të bërë përmes makinave digjitale të kërkimit, nuk është arritur të gjendet asnjë artikull nga ndonjë burim kredibil që flet për organizimin e një ngjarje të tillë.
Analiza:
Nga kontrolli i fakteve i bërë, rezulton se përmbajtja dhe fotografia nuk janë në përshtatje me ngjarjen.
Citatet dhe fotografia e përdorur në artikull janë shkëputur nga ngjarje të ndryshme, nuk i korrespondojnë titullit të artikullit dhe, për këtë arsye, hibrid.info e vlerëson këtë si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
