Disa faqe në Facebook kanë publikuar artikull të portalit të dyshimtë “Banglacontent24.com” me titull “Çdo kosovar do të marrë shtetësinë shqiptare ose t’i mbajë të dyja”.
Nga verifikimi i fakteve, hibrid.info ka vërtetuar se titulli është jo adekuat, që nuk përputhet me përmbajtjen.
Në përmbajtje gjendet premtimi i bërë nga kryetari i Partisë Demokratike në Shqipëri, Sali Berisha, i cili kishte thënë se do t’ia ofrojë mundësinë kosovarëve të marrë shtetësinë shqiptare, në rastin e rikthimit të tij në pushtet.
“Një nga marrëveshjet e para që do të firmosë me qeverinë e Kosovës, do të jetë marrëveshja e shtetësisë. Cilido shqiptar në të dy anët e kufirit do ketë të drejtë të zgjedhë shtetësinë që dëshirojnë, ose të mbajë dy shtetësi”, theksoi Berisha.
Pra, në titullin e artikullit nuk qartësohet se ky është vetëm një premtim i tiji, por pretendohet të paraqitet si e mirëqenë.
Vegëzat e artikullit të publikuar në Facebook nga faqet “Gazeta Prishtina” dhe “Lajmet e Fundit +”:
Ky artikull është publikuar nga portali “Banglacontent24.com” me datë 3 korrik. (shih këtu)
Pas hulumtimit të bërë përmes makinave online të kërkimit, hibrid.info ka arritur të gjejë artikullin e publikuar në kohë reale 2 korrik në disa media online në Kosovë, që kanë raportuar saktë se Berisha ka premtuar shtetësi shqiptare për çdo kosovar. (shih këtu dhe këtu)
Analiza:
Disa faqe në Facebook kanë publikuar një artikull të portalit të dyshimta “Banglacontent24.com”, i cili ka të bëjë me një premtim të Sali Berishës.
Mirëpo, këtij artikulli i është vënë titull jo adekuat që nuk tregon se bëhet fjalë për një premtim, si dhe nuk bëhet e qartë se kush e ka thënë atë, duke e lënë të kuptohet si e mirëqenë. Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
