Portali i dyshimtë në gjuhën shqipe “albasky.com” ka publikuar artikullin me titull “Europa është një shtëpi e madhe dhe e bukur por nuk ka vend për Shqipërinë dhe Kosoven”.
Hibrid.info ka verifikuar faktet në këtë artikull dhe ka vërtetuar se titulli është i sajuar, që nuk i përgjigjet përmbajtjes.
Gjithashtu, lajmi është i vjetër, i cili u publikua në tetor të vitit 2019 dhe ka të bëjë me takimin ndërmjet presidentit të Francës, Emmanuel Macron, dhe tashmë ish-kancelares gjermane, Angela Merkel.
Në këtë takim ishte negociuar edhe për procesin e integrimit të Shqipërisë dhe Maqedonisë së Veriut. Në kuadër të takimit, presidenti francez kishte thënë se BE ka nevojë për reformim të brendshëm, para negocimit për zgjerim. Por ai nuk ka thënë se nuk ka vend për Shqipërinë dhe Kosovën në Evropë, siç pretendohet rrejshëm në titullin e këtij artikulli.
Vegëza e artikullit të publikuar në portalin e dyshimtë “albasky.com”:
Artikulli me titull të rremë është shpërndarë edhe në Facebook nga faqja “Gazeta Aktive”, e cila në këtë postim ka arritur të grumbullojë numër të madh të komenteve, reagimeve dhe shpërndarjeve. (shih këtu)
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar nga portali “shekulli.com.al” me datë 17 tetor 2019. (shih këtu)
Analiza:
Portali i dyshimtë “albasky.com” ka publikuar një artikull të vjetër të vitit 2019 të cilin është munduar ta paraqesë si aktual, duke i vënë titullin e rremë “Europa është një shtëpi e madhe dhe e bukur por nuk ka vend për Shqipërinë dhe Kosoven”.
Pas analizës së kontrollit të fakteve bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arysetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
