Në mediat serbe dje (8 nëntor) ka zënë vend një prononcim të zëdhënëses së ministrisë së punëve të jashtme të Rusisë, Maria Zaharova ku pretendon se Perëndimi po e shtynë situatën në veri të Kosovës drejt një konflikti të hapur.
Artikujt e publikuar në mediat serbe mbajnë këtë titull: “Zakharova: Perëndimi po e shtyn situatën në Kosovë dhe Metohi drejt një konflikti të hapur”.
Në përmbajtje të artikullit citohet deklarata e Zaharovës, ku pretendohet se Rusia është e shqetësuar për përshkallëzimin e situatës në Kosovë, për shkak se, sipas saj, Perëndimi po e shtyn situatën drejt një konflikti të hapur dhe nuk po bënë asgjë për të ndaluar provokimet e radikalëve nga Prishtina.
Vegëzat e deklaratës të publikuara në disa media serbe:
https://www.politika.rs/sr/clanak/524146/Zaharova-Zapad-gura-situaciju-na-KiM-ka-otvorenom-sukobu
https://www.k1info.rs/vesti/svet/7194/zaharova-zapad-gura-situaciju-na-kim-ka-otvorenom-sukobu/vest
http://www.tanjug.rs/full-view.aspx?izb=756955
https://www.dnevnik.rs/politika/zaharova-zapad-gura-situaciju-na-kim-ka-otvorenom-sukobu-07-11-2022
Pjesë të deklaratës së publikuar në mediat serbe:
“Ne jemi të shqetësuar nga përkeqësimi i situatës rreth Kosovës, ku të ashtuquajturat autoritete të Prishtinës po ngrenë sërish qëllimisht tensionet nën syrin pasiv apo edhe me mbështetjen e drejtpërdrejtë të sponsorëve të tyre në Uashington dhe aleatëve evropianë”, tha ajo.
Ajo theksoi se përshkallëzimi aktual po ndodh në një kohë kur Bashkimi Evropian, i cili u autorizua nga Asambleja e Përgjithshme e Kombeve të Bashkuara për të ndërmjetësuar në dialogun ndërmjet Beogradit dhe Prishtinës, në thelb nuk dëshiron ose nuk është në gjendje ta zgjidhë këtë çështje.
Zëdhënësja e Ministrisë së Jashtme ruse, Zaharova, pretendon në mënyrë tendencioze se Perëndimi po e shtyn situatën në Kosovë në konflikt të hapur, pasi sipas saj, nuk po ndërmerr hapa efektivë për t’i dhënë fund provokimeve të shqiptarëve radikalë të Kosovës.
Këto pretendime Zaharova i bën pas përshkallëzimit të situatës në veri, e ku edhe perëndimi edhe Prishtina zyrtare nuk po nxisin konflikt të hapur, siç pretendon Zaharova.
Për më tepër, sekretari i Përgjithshëm i NATO-s, Jens Stoltenberg, pas një bisede që ka pasur me kryeministrin e Kosovës, Albin Kurti dhe presidentin serb, Aleksandar Vuçiq në lidhje me situatën aktuale në veri të Kosovës, përmes një postimi në Twitter, thotë se u ka kërkuar të dyja palëve që të përmbahen nga përshkallëzimi i situatës. (këtu)
Edhe Shtetet e Bashkuara të Amerikës u bënë thirrje Kosovës dhe Serbisë të zgjedhin rrugën e bisedimeve dhe të përmbahen nga veprimet që do të çonin në dhunë dhe përplasje, si dhe të përmbushin obligimet që dalin nga dialogu i ndërmjetësuar prej Bashkimit Evropian në Bruksel. (këtu)
Për më tepër, edhe shefi i diplomacisë së Bashkimit Evropian, Josep Borrell u ka bërë thirrje Prishtinës dhe Beogradit që të përmbahen nga çfarëdo veprimi i njëanshëm që mund të rrisë tensionet. (këtu)
Bashkimi Evropian ka përsëritur thirrjet për ruajtjen e qetësisë në Kosovë, si dhe që të shmanget eskalimi i tensioneve të krijuara. Peter Stano, zëdhënës i BE-së për Çështje të Jashtme dhe Sigurisë, ka thënë në konferencën për shtyp se, “BE-ja dëshiron t’i afrojë Kosovën dhe Serbinë drejt një zgjidhjeje evropiane, t’i ulin tensionet dhe që sa më shpejt të përfshihen në dialog, sepse kjo është e vetmja rrugëdalje nga eskalimi momental. Kjo është rruga që çon deri te perspektiva evropiane për të dy partnerët”. (këtu)
Bazuar në deklaratat e zyrtarëve të SHBA-së, BE-së, dhe NATO-s, të cilët përfaqësojnë qëndrimin e Perëndimit që Zaharova i drejtohet, bëhet thirrje e hapur për përmbajtje nga çfarëdo veprimi i njëanshëm që mund të rrisë tensionet, e jo siç pretendohet nga Zaharova se po e shtyn situatën në Kosovë në konflikt të hapur.
Analiza:
Në mediat serbe është publikuar pretendimin i zëdhënëses së ministrisë së jashtme të Rusisë, Maria Zaharova, se Perëndimi po e shtynë situatën në veri drejt një konflikti të hapur.
Deklaratat e zyrtarëve të SHBA-së, BE-së dhe NATO-së, si përfaqësuesit të Perëndimit, lidhur me zhvillimet e fundit në veri, bëjnë thirrje të hapur për përmbajtje nga çfarëdo veprimi i njëanshëm që mund të rrisë tensionet.
Bazuar në metodologjinë e punës, hibrid.info, këto pretendime i vlerëson si “teori konspirative”.
Vlerësimi
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
