Shkroi: Etrit Rexhepi
Publikohet pretendimi se nga 1 janari, do të mund të doganohen veturat e vjetra deri në 20 vjet.
Pretendimi ka ardhur me anë të një mbishkrimi në një imazh (këtu), të publikuar në TikTok nga një llogari me emrin “arsimtoverlani”.
Cila është e vërteta?
Hibrid.info ka gjetur se ligji në fuqi nuk e lejon importimin e veturave më të vjetra se dhjetë vjet.
Për të vërtetuar se pretendimi, hibrid.info ka hulumtuar brenda ligjit për automjete. Në ligjin e aprovuar në vitin 2017, në nenin 44, tregohet se “Në Kosovë nuk mund të importohen vetura më të vjetra se dhjetë (10) vjet” (shih këtu).
Hibrid.info ka gjetur edhe përmbajtje që tregon se brenda këtij viti në Kuvendin e Kosovës, ka pasur përpjekje për ndryshimin e pikës së këtij neni (shih këtu), çka dëshmon se lejimi i importit për veturat e vjetra deri në dhjetë vjet, është ende në fuqi.
Përmbajtja e publikuar në TikTok deri në momentin e trajtimit nga Hibrid.info ka grumbulluar mbi 410 mijë shikime dhe ka marrë mbi 2700 pëlqime.
Analiza:
Pretendimi se nga 1 janari do të mund të importohen veturat e vjetra deri në 20 vjet, është i pasaktë.
Në Kosovë ende është në fuqi ligji, që përcakton se nuk mund të importohen vetura më të vjetra se dhjetë vjet.
Andaj bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.