Artikulli me titull “Lajmi i mirë: Qeveria rritë socialin , ja sa do te merrni tani!” është publikuar nga portali i dyshimtë “Revista.trendliveg24.com”.
Nga verifikimi i fakteve i kryer nga Hibrid.info, është vërtetuar se titulli i këtij artikulli është i rremë, duke qenë se nuk përputhet me përmbajtjen.
Me këtë titull, ky portal ka synuar ta paraqesë lajmin si aktual, ndërsa në përmbajtje gjendet një artikull i vjetër i publikuar më 27 tetor 2021, që kishte të bëjë me dyfishimin e pagesës për përfituesit e skemës së ndihmës sociale për periudhën nëntor- dhjetor 2021.
Pra nuk ka asgjë të vërtetë se Qeveria e Kosovës ka marrë vendim për rritjen e pagesës për përfituesit e skemës sociale, siç pretendohet rrejshëm në titullin e këtij artikulli.
Vegëza e artikullit të publikuar nga portali i dyshimtë “Revista.trendliveg24.com”:
Artikulli i vjetër me titull të rremë është postuar sot (24 janar) edhe në Facebook nga faqja “Info sot”, e cila ka afër 30 mijë ndjekës. (shih këtu)
Pas hulumtimit përmes makinave të kërkimit dhe rrjeteve sociale, Hibrid.info ka arritur ta gjejë artikullin autentik të publikuar në kohë reale nga portali “IndeksOnline.net”, i cili edhe është cituar në artikullin e publikuar nga “Revista.trendliveg24.com”. (shih këtu)
Analiza:
Portali i dyshimtë “Revista.trendliveg24.com” sot (24 janar) ka publikuar një artikull të vjetër të muajit tetor 2021, i cili kishte të bëjë me njoftimin për dyfishimin e pagesës për përfituesit e skemës së ndihmës sociale për periudhën nëntor- dhjetor 2021.
Këtij artikulli qëllimshëm i është vënë titull i rremë me pretendimin se Qeveria e Kosovës ka marrë vendim për rritjen e pagesave për përfituesit e skemës së ndihmës sociale.
Hibrid.info pas analizës së kontrollit të fakteve bazuar në metodologjinë e punës, këtë artikull e ka vlerësuar si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.