Portali i dyshimtë me përmbajtje në gjuhën shqipe “au.active24live.com” ka publikuar një artikull me titull “Paga MinimaIe do te behet 500 Euro dhe do te Iejohet Terheqja e TRUSTlT”.
Pas verifikimit të fakteve, hibrid.info ka vërtetuar se titulli i këtij artikulli është i sajuar, që nuk përputhet me përmbajtjen.
Lajmi ka të bëjë me kërkesën e punëtorëve të sektorit privat për rritjen e pagës minimale deri në 500 euro, për shkak të rritjes së çmimeve në vend, derisa kanë kërkuar edhe ndarjen e mjeteve nga Trusti.
Pra, në titullin e këtij artikulli pretendohet rrejshëm se paga minimale do të bëhet 500 euro, si dhe do të lejohet tërheqja e mjeteve nga Trusti.
Vegëza e artikullit të publikuar në portalin e dyshimtë “au.active24live.com”:
Ky artikull me titull të sajuar është shpërndarë edhe në rrjetin social Facebook nga faqet “Express Gazeta” dhe “Gazeta Shqip”, të cilat numërojnë afër 70 mijë ndjekës secila. (shih këtu dhe këtu)
Deklarata e kryetarit të Sindikatës së Pavarur të Sektorit Privat të Kosovës, Jusuf Azemit e bërë dje (15 korrik), në një konferencë për media:
“Sa i përket çështjes së pagës minimale, ju e dini se sindikata e ka pasur një kosto, kemi thënë që do të jetë 460 euro, por megjithatë tani e tutje mendojmë që paga nën 500 euro as që ja vlen të bisedohet”, tha ai.
Pas hulumtimit përmes makinave online të kërkimit, hibrid.info ka arritur të gjejë artikullin e publikuar në mediat online në Kosovë. (shih këtu dhe këtu)
Analiza:
Portali i dyshimtë “au.active24live.com” ka publikuar kërkesën e kryetarit të Sindikatës së Pavarur të Sektorit Privat të Kosovës, Jusuf Azemi, i cili është shprehur që paga minimale të mos jetë nën 500 euro, si dhe të mundësohet tërheqja e Trustit.
Mirëpo, këtij artikulli ky portal i dyshimtë i ka vënë titull të sajuar “Paga minimaIe do të bëhet 500 euro dhe do të lejohet tërheqja e Trustit”, që lë të kuptohet se këto vendime kanë hyrë në fuqi.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
