Një llogari në TikTok që mban emrin “mtrks25” ka publikuar dje (24 mars) një video-material në të cilin shfaqet një ushtar pranë një makine ushtarake të rrokullisur.
Këtij video-materialit, llogaria e lartcekur i ka vënë një mbishkrim, duke pretenduar se pamjet janë xhiruar afër kufirit me Serbinë dhe se ka pasur siç thuhet “probleme” ndërmjet Njësisë Speciale të Kosovës me atë të Serbisë.
Pas verifikimit të fakteve përmes programit të automatizuar “InVID”, hibrid.info ka vërtetuar se ky pretendim është i rremë dhe se pamjet shfaqin përmbysjen e një automjeti ushtarak në autostradën 401 në Oshawa të Ontarios në Kanada.
Vegëza e video-materialit të publikuar në TikTok nga llogaria “mtrks25”:
Hibrid.info ka arritur të gjejë video-materialin e njëjtë të publikuar nga disa faqe kanadeze në Instagram si “canadabevibin” dhe “toronto_only”, ku sqarohet se ngjarja ka ndodhur në një autostradë në Kanada.
Përveç në këto faqe në Instagram, hibrid.info ka arritur të gjejë edhe artikuj të publikuar në media të huaja si “toronto.ctvnews.ca” dhe “cp24.com”, që kanë raportuar për përmbytjen e automjetit ushtarak në autostradën 401 në Oshawa.
Analiza:
Pas verifikimit të fakteve të kryer nga hibrid.info, është vërtetuar se një llogari në TikTok ka publikuar video-material që shfaq pamjet e një automjeti ushtarak të rrokullisur në Kanada, me anë të së cilit ka pretenduar rrejshëm se videoja është xhiruar afër kufirit me Serbinë.
Përveç kësaj, në mbishkrim të video-materialit pretendohet rrejshëm, se siç thuhet ka “probleme” ndërmjet Njësisë Speciale të Kosovës dhe asaj serbe.
Bazuar në metodologjinë e punës, hibrid.info e vlerëson këtë postim të publikuar në TikTok si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.