Portali informativ në gjuhën shqipe “Kosova-sot.info” ka publikuar një artikull me pretendimin se ka filluar të paguhet për çeset e plastikës në Kosovë.
Në titullin e këtij artikulli shkruan: Qeset e plastikës në Kosovë bëhen me pagesë
Nga trajtimi i bërë, rezulton se ky titull është i pasaktë, që lë të kuptohet se qeset e plastikës, tashmë janë bërë me pagesë në Kosovë (shih artikullin këtu).
Ky artikull është i bazuar në një intervistë të bërë për televizionin kosovar KTV, nga zëvendësministrja e Mjedisit – Linda Çavdarbasha.
Mirëpo, në këtë intervistë nuk thuhet ajo që pretendohet në titullin e artikullit të “Kosova-sot.info”.
Vegëza e intervistës së zëvendësministres Çavdarbasha në KTV:
Në këtë intervistë, Çavdarbasha ka bërë të ditur se vendosja e një çmimi për qese të plastikës është vetëm në nivel planifikimi. Pra, me këtë, e hedhë poshtë pretendimin e bërë në titullin e “Kosova-sot.info”.
Sipas saj, ministria të cilët e përfaqëson ajo, së bashku me ekspertë të mbështetur nga organizata gjermane “GIZ”, janë duke i diskutuar e shqyrtuar modalitetet për t’i futur në një Udhëzim Administrativ që obligon shitjen e qeseve njëpërdorimshme të plastikës.
Pjesë nga intervisat e zëvendësministres Çavdarbasha në KTV:
“Bazuar në hulumtim dhe të dhënave nga Dogana dhe prodhuesit, ka dalë që tri opsione mund të jenë të përshtatshme për qeset plastike: 1. Që në mënyrë vullnetare qytetari të mos i marr qeset plastike në market; 2. Që të vendoset një taksë që qeset plastike të bëhen me pagesë; dhe 3. Që ato të largohen tërësisht nga tregu. Nuk kemi dashur që ta bëjmë këtë opsionin e tretë menjëherë, mirëpo fillimisht ta bëjmë opsionin me pagesë. Duhet të punojmë shumë në edukim dhe ndërgjegjësim të qytetarëve. Kemi filluar të shpërndajmë qese të biodegradueshme prej materialit në shesh të qytetit në Prishtinë. Duhet të punohet në pjesën e edukimit shumë por nuk mendoj se do të jetë problem pasi qytetar është i gatshëm ta pranojë këtë ndryshim”.
Në artikullin e “kosova-sot.info” gjithashtu pretendohet se çmimi i një qese të plastikës do të jetë 10 cent, ndërsa e njëjta nuk thuhet edhe në intervistën e zëvendësministres Çavdarbasha në KTV.
Specifikime rreth çmimit jepen vetëm në një intervistë të zëvendësministres Çavdarbasha të bërë më 11 qershor në agjencinë e lajmeve “Kosovapress”.
Analiza:
Pretendimi se qeset njëpërdorimshe të plastikës janë bërë me pagesë në Kosovë, i bërë nga “Kosova-sot.info”, rezulton të jetë i pasaktë. I pasaktë del të jetë edhe çmimi i presupozuar (10 cent), i bërë në titullin e artikullit të këtij mediumi.
Sipas analizës së bërë, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
