Një faqe në median sociale Facebook ka publikuar sot (2 shkurt) një fotografi me mbishkrimin “I dashuri gjerman rrah kosovaren në Prishtinë / Lexo lajmin e plote ne koment”, duke i bashkëngjitur një vegëz për të klikuar në siç thuhet aty “lajmin e plotë”.
Pas klikimit në vegëzën e dhënë në koment, hapet një artikull i vjetër i publikuar më 19 korrik të vitit 2023. (këtu)
Vegëza e artikullit të publikuar nga faqja “Tringa Globale”:
Brenda artikullit sqarohet se ky tekst është marrë nga portali informativ Zëri.info, ndërsa pas kërkimeve hibrid.info ka gjetur edhe artikullin origjinal të Zëri.info të publikuar më 19 korrik 2023. (shih këtu)
Gjithashtu, as në raportin e fundit 24 orësh nga Policia e Kosovës (2 shkurt) nuk ka raportim për një ngjarje të tillë. (shih fotografinë më poshtë)
Analiza:
Duke paraqitur një artikull të vjetër sikur aktual, një faqe në Facebook ka pretenduar për dhunë ndaj një gruaje në Prishtinë.
Hibrid.info, pas verifikimit të fakteve ka gjetur artikullin origjinal për këtë ngjarje dhe ka vërtetuar se ky rast ka ndodhur në korrik të vitit të kaluar. As në raportin e fundit policor 24 orësh nuk gjendet një ngjarje e tillë.
Në bazë të metodologjisë së punës, hibrid.info këtë artikull e vlerëson si “clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.