Portali i dyshimtë me përmbajtje në gjuhën shqipe “Lajmet.trendliveg24.com” ka publikuar një artikull me titull “Së shpejti do të fitojnë kartela pagesore me nga 100 euro këta kategori të qytetarëve”.
Pas verifikimit të fakteve të kryer nga hibrid.info, është vërtetuar se ky artikull përmban titull të sajuar, ndërsa lajmi është i vjetër.
Hibrid.info gjatë hulumtimit të kryer përmes makinave të kërkimit, ka gjetur se artikulli është publikuar në tetor të vitit 2020 dhe ka të bëjë me Maqedoninë e Veriut, atëkohë kur Lidhja Socialdemokrate e Maqedonisë (LSDM) kishte njoftuar rritjen e pagës minimale, ndihmat sociale, shtesat për fëmijë, pensionin social dhe pakot ekonomike me ndihmat që kanë ndërmarrë gjatë pandemisë.
Vegëza e artikullit të publikuar në portalin e dyshimtë “Lajmet.trendliveg24.com”:
Artikulli i njejtë është shpërndarë edhe në rrjetin social Facebook nga faqja “33shi.com”, e cila numëron afër 50 mijë ndjekës. (shih këtu)
Hibrid.info ka arritur të gjejë artikullin e publikuar në kohë reale nga disa media online në Maqedoninë e Veriut si “Pacensure.com” dhe “Fol.mk”. (shih këtu dhe këtu)
Analiza:
Portali i dyshimtë “Lajmet.trendliveg24.com” ka publikuar një artikull të vjetër të muajit tetor 2020, të cilin është munduar ta paraqesë si aktual duke i vënë titull të sajuar.
Pas analizës së kontrollit të fakteve bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
