Nata e 1 gushtit ishte një natë e tensioneve të mëdha në veri të Kosovës. Sirenat e sulmeve ajrore me orë të tëra në qytetet në veri; barrikada në rrugët hyrëse për në Jarinjë dhe Bërnjak; një numër i madh i policisë speciale të Kosovës; dhe një sasi e pabesueshme dezinformimi në një situatë kur informacioni i vërtetë është i kufizuar.
Diku rreth orës shtatë e gjysmë më 31 korrik, kur u dëgjuan sirenat në Mitrovicën Veriore dhe në vende të tjera në veri të populluar nga serbët, si dhe u ngritën barrikada, ndërkohë që informacioni ishte ende i freskët, kanale të ndryshme të dyshimta serbe dhe ruse vunë në qarkullim gjysmë-informacione, keqinformime dhe dezinformata të ndryshme.
Paralajmërimin e parë për shpërndarjen e dezinformatave e bëri zëvendëskryeministri i Kosovës, Besnik Bislimi, duke shpërndarë në llogarinë e tij Twitter (30 Korrik) (shih këtu) një lajm të përgatitur nga mediumi serb “b92.net” me titull “Shqiptarët po përgatisin ferrin për Kosovën dhe Metohinë”.
“Prodhimi i tepërt i artikujve të tillë të sponsorizuar nga qeveria në mediat serbe, është ilustrim i përsosur i frikësimit si strategji kryesore e qeverisë në shfrytëzimin e turpshëm të mediave për përhapjen e panikut dhe promovimin e ‘akteve heroike’ të udhëheqjes shtetërore”, ka shkruar Bislimi në lidhje me këtë artikull.
Platforma më e njohur në Kosovë për verifikimin e fakteve “hibrid.info” e ka analizuar artikullin e publikuar nga “B92.net” e të shpërndarë nga zëvendëskryeministri Besnik Bislimi.
Në këtë artikull, Ministri i Jashtëm i Serbisë, Nikolla Selakoviq, ka pretenduar se “shqiptarët janë duke planifikuar ‘ferrin’ në Kosovë”. Nga ana tjetër, “hibrid.info” arrin në përfundim se: “pretendimi i Selakoviqit vlerësohet se “Teori Konspirative”, ndërsa publikimi i kësaj deklarate nga mediat, vlerësohet si “Raportim i Njëanshëm” dhe “Përmbajtje e Pa Verifikuar”. (shih këtu)
Në kuadër të verifikimit të fakteve në lidhje me zhvillimet e fundit në veri të Kosovës hibrid.info ka verifikuar një sërë artikujsh të shpërndara në mediume, portale dhe faqe në facebook. Pretendimi i rrejshëm për plagosjen e zyrtarit policor dhe qytetarëve serbë në veri i publikuar në mediumin në gjuhën shqipe “Nacionale.com” (31 korrik), një lajm që u demantua nga Policia e Kosovës dhe që nga hibrid.info u vlerësua si lajm i rremë, i bazuar në burime jo të sakta. Më pas, portali “Nacionale.com” e ka fshirë nga ueb faqja këtë artikull, por i njëjti vazhdon të qarkullojë online nga portale tjera. (shih këtu)
Portali “Jepize.com” (31 korrik) ka publikuar njoftimin e Policisë së Kosovës për mbylljen e pikë kalimeve kufitare në Jarinjë dhe Bërnjak, ndërsa këtij artikulli i ka vënë titull jo adekuat “Zyrtare: Mbyllen kufijtë e Kosovës, gjendje alarmante”. Sipas “hibrid.info”, “Me këtë titull lë të kuptohet se janë mbyllur të gjithë kufijtë e Kosovës, duke mos qartësuar se bëhet fjalë vetëm për këto dy pikë-kalime kufitare” dhe ky artikull është vlerësuar si “clickbait”. (shih këtu)
Media në gjuhën shqipe kanë publikuar artikull për reagimin e Bashkimit Evropian për zhvillimet e fundit në veri të Kosovës, me titull që pretendon se këta të fundit e kanë “qortuar” palën kosovare për veprime të njëanshme.
Artikujt me reagimin e BE-së, me tituj që pretendojnë se Brukseli zyrtar ka qortuar Qeverinë e Kosovës për aksion të njëanshëm, janë publikuar nga mediat “Gazetablic.com”, “Gazetaexpress.com”, “Demokracia.com” dhe “Insajderi.org”. Sipas “hibrid.info” “pretendimi i bërë i disa mediave në gjuhën shqipe se BE ka qortuar Qeverinë e Kosovës për veprime të njëanshme, duke iu referuar veprimeve të fundit në veri të Kosovës, është interpretuar gabimisht” prandaj edhe është vlerësuar si dezinformatë. (shih këtu)
Shtyrja e zbatimit të vendimeve për reciprocitet me Serbinë u bë për shkak të fushatës së madhe të dezinformimit që Beogradi ka bërë mbi qytetarët e Kosovës, tha kryeministri i Kosovës, Albin Kurti, gjatë seancës parlamentare të 4 gushtit në Kuvendin e Kosovës.
“Ka qenë e egër fushata e dezinformimit, është folur për operacionin Stuhia, se do të ndodhë të dielën, është folur për ferrin që do t’i pllakosë serbët në Kosovë, e të tjera e të tjera”, tha Kurti.
Ai po ashtu deklaroj se këto dezinformata kanë shtyrë Qeverinë e Kosovës që të pranojë te faktorët ndërkombëtarë evropianë dhe amerikanë shtyrjen e vendimit deri më 1 shator 2022.
Në një artikull të publikuar në Radion Evropa e Lirë në lidhje me shpërndarjen e dezinformatave për Kosovën nga kanalet ruse dhe pro-ruse në Telegram thuhet se me 31 korrik rreth orës 19 është publikuar njoftimi për plagosjen e parë të supozuar të një serbi në një bllokadë në rrugë që çon drejt vendkalimit në Jarinjë (Drejtori i Qendrës shëndetësore në Mitrovicën Veriore, Zllatan Elek, ka konfirmuar për mediat lokale të dielën se asnjë person i plagosur nuk ka shkuar në këtë institucion prej nisjes së bllokadës më 31 korrik). (shih këtu)
Gjatë zhvillimeve në veri në natën e 31 korrikut, disa kanale ruse raportojnë për përleshje të armatosura. Më tej kanalet shkruajnë se shqiptarët po grumbullohen në jug të Mitrovicës dhe se janë, siç pretendojnë disa kanale ruse, edhe të armatosur. E gjithë kjo pa prova apo konfirmim. Më pas bëhet e ditur se ushtria serbe aeroplanët e saj i ka dërguar në kufirin administrativ. Po ashtu qarkullon njoftimi se Albin Kurti dyshohet se e kishte quajtur të gjithë operacionin “Stuhia e zezë”. (shih këtu)
E gjithë kjo vazhdoi deri në njoftimin se zbatimi i vendimit për regjistrimin e automjeteve dhe letërnjoftimet është shtyrë për një muaj.
Në një intervistë për Radion Evropa e Lirë, kryeministri i Kosovës deklarojë se fushata dezinformuese ka shkaktuar ankth dhe pasiguri në veri.
“Duke qenë se serbët në Kosovë përgjithësisht i shikojnë mediat televizive në Serbi dhe ta zëmë, kanali i dytë i RTK-së nuk arrin të depërtojë sa mediat e Serbisë, qytetarët serbë në Kosovë, por edhe qytetarët serbë në Serbi i janë nënshtruar një fushate të paparë të dezinformimit për atë se çka do të ndodhë më 1 gusht. Dhe, kjo pastaj ka krijuar shumë frikë, shumë ankth dhe shumë pasiguri edhe tek ata”, deklaroi Kurti. (shih këtu)
