Ministri i Jashtëm i Serbisë, Nikolla Selakoviq, ka pretenduar se “shqiptarët janë duke planifikuar ‘ferrin’ në Kosovë”.
Këtë pretendim të pa mbështetur në fakte, ky ministër serb e ka bërë sot (30 korrik), në një prononcim për media, të dhënë pas një mbledhje të partisë në pushtet atje, SNS-së.
Por, këtë paralajmërim, Selakoviq nuk e bazon në asnjë të dhënë apo fakt dhe nuk sqaron se çfarë nënkupton me cilësimin “ferr”. Rrjedhimit, i gjithë ky aludim i tij, nuk ndërlidhet me asnjë ngjarje, ndonëse ai lë të kuptohet se po e bazon në vendimin e Qeverisë së Kosovës, të 29 qershorit, për masën reciproke me Serbinë në aspektin e targave të automjeteve dhe letërnjoftimet, që pritet të zbatohet nga 1 gushti (shih këtu).
Megjithatë, në deklaratën e tij, Selakoviq nuk zbulon asnjë arsye që ta argumentojë pretendimin e bërë.
Vegëza e deklaratës së Nikolla Selakoviq, e publikuar në mediumin serb B92:
https://www.b92.net/info/vesti/index.php?yyyy=2022&mm=07&dd=30&nav_category=640&nav_id=2191780
Pjesë të deklaratës së Nikolla Selakovioqit të përkthyera në shqip:
Pala shqiptare e Kosovës dhe Metohisë “fjalë për fjalë është duke përgatitur ferrin në ditët në vijim”.
Deklarata e ministrit serb Selakoviq, është publikuar nga shumë media serbe (shih këtu, këtu dhe këtu).
Analiza:
Ministri i Jashtëm i Serbisë, Nikolla Selakoviq, bënë pretendim të pa argumentuar.
Nga kontrolli i fakteve i kryer nga hibrid.info, bazuar në metodologjinë e punës, pretendimi i Selakoviqit vlerësohet se “Teori Konspirative”, ndërsa publikimi i kësaj deklarate nga mediat, vlerësohet si “Raportim i Njëanshëm” dhe “Përmbajtje e Pa Verifikuar”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
Vlerësim si “Raportim i njëanshëm” merr ai raport mediatik i cili vërehet qartë se bënë favorizim të fakteve, qëndrime dhe përfundime që përputhen me një narrativë të veçantë, shpesh duke mos respektuar rregullin e kontaktit me palën tjetër kur bëhet fjalë për pretendime që janë të dëmshme për reputacionin e dikujt ose të portretizuar nga akterë të caktuar me një qasje negative. Një nga format e raportimit të njëanshëm është paraqitja selektive e fakteve, ku theksohen fakte që mbështesin një tezë të caktuar, ndërsa faktet që nuk e konfirmojnë atë janë lënë pas dore.
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.