Portali i dyshimtë në gjuhën shqipe “readkoala.com” ka publikuar një artikull me pretendimin se janë arrestuar mjekë kosovarë, të cilët shisnin fëmijë.
Pas analizës së kontrollit të fakteve të kryer nga hibrid.info, del që ky artikull përmban titull të rremë dhe që nuk përputhet më përmbajtjen në tekst.
Lajmi është i muajit janar, i publikuar në BBC dhe i përkthyer nga portali shqiptar “joq-albania.com”, ku shkruan se kjo ngjarje ka ndodhur në shtetin e Ganës.
Megjithatë, ky portal i dyshimtë, këtij artikulli i ka vënë edhe fotografi që nuk përputhet me përmbajtjen, ku shihet objekti i Emergjencës në Qendrën Klikinike Universitare të Kosovës (QKUK). Kështu duke pretenduar rrejshëm se ngjarja ka të bëjë me mjekët kosovarë.
Pjesë nga teksti i artikullit të publikuar në “readkoala.com”:
Arre StØhen mjekët tanë që shisnin fëmijë nga 4800 euro
Ditën e sotme, janë arr es tuar 11 persona për trafikim foshnjash. 11 të dyshurarit, përfishjnë mjekë infermierë dhe oficerë të miëqenies sociale.
Këta të fundit u arrestuan, pasi dyshohet se kryenin operacione në objektet shëndetësore në kryeqytetin Akra dhe qytetin fqinj të Tema.
Vegëza e artikullit të publikuar në “readkoala.com”:
Vegëza e artikullit të përkthyer e publikuar në kohë reale nga “joq-albania.com”:
https://joq-albania.com/artikull/825620.html
Më poshtë mund të gjeni artikullin autentik të publikuar nga BBC, ku flet për arrestimin e mjekëve në Ganë për shitjen e fëmijëve të posalindur.
https://www.bbc.com/news/world-africa-55751290
Analiza:
Portali i dyshimtë “readkoala.com” ka publikuar një artikull të vjetër rreth arrestimit të disa mjekëve ganezë për shitjen e foshnjeve, të cilit i ka vënë titull dhe fotografi të rreme, duke pretenduar rrejshëm që ngjarja ka të bëjë me mjekët kosovarë.
Pas analizës së kontrollit të fakteve të kryer nga hibrid.info, ky artikull merr vlerësimin si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
