“Investiguesi Shkrimor”, një llogari me përmbajtje propaganduese në gjuhën shqipe në Facebook, ka publikuar dje (24 gusht) një postim ku pretendohet se ‘Ligjvënësit në Florida kanë njoftuar planet për të përcaktuar zyrtarisht vaksinat mRNA Covid si “armë bio’ që janë të rrezikshme për shëndetin e njeriut.”.
Postimi është shoqëruar edhe me një video-material marrë nga “CBS12”, televizion amerikan në shtetin e Floridas – SHBA, në studion e të cilit diskutohet pretendimi i shfaqur nga llogaria e lartcekur.
Megjithatë, hibrid.info ka gjetur se pretendimi nga kjo faqe është i pasaktë. Në bazë të gjetjeve është bërë e qartë se bëhet fjalë për kërkesë nga disa anëtarë të Partisë Republikane nga qarku Lee (vend në shtetin e Floridas), për ndalimin e këtyre vaksinave dhe jo nga ligjvënësit e këtij shteti, siç pretendohet në artikull.
Vegëza e postimit të publikuar nga llogaria “Investiguesi Shkrimor”:
Hibrid.info ka verifikuar dhe ka gjetur artikull nga “winknews.com” ku tregohet për rezolutën jo detyruese mbi kërkesën për ndalimin e vaksinave, miratuar brenda Komitetit Ekzekutiv të Partisë Republikane të Qarkut Lee, e cila i është dërguar Ron DeSantis, guvernator i shtetit të Floridas. (shih këtu)
Po ashtu edhe në video-materialin e shoqëruar postimit të “Investiguesi Shkrimor”, tregohet se bëhet fjalë për kërkesë nga Partia Republikane e qarkut Lee, të ndalimit të vaksinave në Florida.
Pretendimet se shteti i Floridas do t’i ndalojë vaksinat kundër Covid-19, si armë bio, janë kontrolluar dhe hedhur poshtë edhe nga kontrollues faktesh të huaj (FullFact.com, Snopes.com dhe Politifact.com), gjë e cila është theksuar edhe nga “Facebook” në postimin e publikuar nga “Investiguesi Shkrimor” si pjesë e përpjekjeve të “Meta”, për të luftuar lajmet e rreme dhe dezinformatat.
Analiza:
Llogaria me përmbajtje propaganduese në gjuhën shqipe në Facebook, me emrin “Investiguesi Shkrimor” ka publikuar një postim ku pretendohet për planet e ligjvënësve të shtetit të Floridas, për ndalimin e vaksinave në këtë vend.
Por që hibrid.info, duke u bazuar edhe në verifikimin e kontrolluesve të tjerë të fakteve, ka vërtetuar se bëhet fjalë për kërkesë për ndalimin e vaksinave nga Partia Republikane në atë qark.
Andaj edhe bazuar në metodologjinë e punës, hibrid.info e vlerëson këtë përmbajtje si dezinformatë.
Vlerësimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.