Portali “botasot.info” sot (28 gusht) ka publikuar një artikull me titull “Masat e reja anti-covid: Të vaksinuarit do të ndahen nga të pavaksinuarit”.
Në këtë titull nuk është bërë e qartë se për cilin shtet bëhet fjalë, por vetëm pasi të klikosh në të atëherë shihet se ky artikull ka të bëjë me shtetin e Greqisë.
Duke ditur se ky portal është nga Kosova, si dhe shumicën e lexuesve i ka shqipfolës, atëherë shumë lehtë mund të keqkuptohet se bëhet fjalë për vendin tonë.
Gjithashtu, aktualisht në Kosovë është paralajmëruar për masa të reja anti-Covid, dhe me këtë titull të vendosur nga portali “bota-sot.info”, mund t’i bëjë lexuesit të klikojnë në artikull se gjoja këto masa janë paralajmëruar në vendin tonë.
Pjesë nga teksti i artikullit të publikuar në “botasot.info”:
Masat e reja anti-covid: Të vaksinuarit do të ndahen nga të pavaksinuarit
Sezoni i verës është drejt fundit dhe vëmendja e autoriteteve shëndetësorë është përqendruar te vendimet që priten të merren në shtator. Greqia pritet të marrë masa të reja për të parandaluar përhapjen e rasteve por duke ndarë personat e vaksinuar nga të pavaksinuarit, shkruan protothema.
Vendi ka regjistruar 3 000 deri në 3 500 raste gjatë ditëve të fundit, ndërsa të martën Greqia shënoi një rekord në numrin e të infektuarve duke regjistruar 4,608 raste në 24 orë. Masat e reja pritet të hyjnë në fuqi me 13 shtator.
Vegëza e artikullit të publikuar në “botasot.info”:
Analiza:
Portali “botasot.info” ka publikuar një artikull që ka të bëjë me disa masa të reja anti-Covid që pritet të merren në Greqi, ndërsa në titull nuk sqaron se për cilin vend bëhet fjalë.
Kjo lë të kuptohet se lajmi ka të bëjë me Kosovën, duke e ditur se ky medium është i regjistruar në vendin tonë dhe shumica e audiencës janë nga po i njëjti shtet.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.