Faqja në Facebook “Gazetavip.com” ka publikuar një përmbajtje me mbishkrimin: “LAJMI FUNDIT / S’ka shtesa me nga 30 euro për fëmijët”.
Çka nuk është në rregull me këtë mbishkrim?
Mbishkrimi nuk sqaron se bëhet fjalë për procesin e verifikimit të përfituesve të shtesave për fëmijë dhe mundësinë e largimit nga skema të atyre që nuk i plotësojnë kriteret.
Postimit i është bashkangjitur një vegëz që çon në një artikull të publikuar në domenin “toolsyo.com”.
Që në hyrje të artikullit thuhet se “Ministria e Financave, Punës dhe Transfereve ka nisur një proces të gjerë të verifikimit të përfituesve të shtesave për fëmijë në Kosovë, me synimin që pagesat nga buxheti i shtetit të përfundojnë vetëm te familjet që i plotësojnë kriteret e përcaktuara.”
Pra, teksti i artikullit i referohet verifikimit të përfituesve dhe largimit nga skema të personave që nuk i plotësojnë kriteret e përcaktuara.
Megjithatë, kjo nuk sqarohet në mbishkrimin e postimit, i cili mund të krijojë përshtypjen e gabuar se shtesat prej 30 eurosh janë ndaluar për të gjithë përfituesit.
Hibrid.info verifikoi pretendimin e paraqitur në artikull. Përmes motorit të kërkimit “Google”, duke përdorur fjalët kyçe “shtesat verifikimi”, u gjet një artikull i publikuar më 19 korrik në mediumin online “Telegrafi.com”, i cili raporton për të njëjtin proces të verifikimit të përfituesve të shtesave për fëmijë.
Artikulli i “Telegrafi.com” sqaron se bëhet fjalë për verifikimin e mijëra përfituesve potencialë, përfshirë edhe raste nga diaspora, dhe jo për ndalimin e përgjithshëm të shtesave për fëmijë.
Deri në publikimin e këtij artikulli, përmbajtja e lartcekur ka grumbulluar 100 reagime, 77 komente dhe 3 shpërndarje (shih fotografinë më poshtë).
Hibrid.info kishte trajtuar edhe disa përmbajtje të ngjashme më 18 gusht (shih këtu).
Analiza
Përmbajtja e publikuar në Facebook mund të krijojë përshtypjen se shtesat prej 30 eurosh për fëmijët janë ndalur për të gjithë përfituesit.
Megjithatë, artikulli i bashkangjitur flet për procesin e verifikimit të përfituesve dhe mundësinë e largimit nga skema vetëm të familjeve që nuk i plotësojnë kriteret.
Bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi
“Clickbait” vlerësohen ato përmbajtje informative titulli i të cilave është përgjithësues dhe nuk bëjnë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.