Faqja në Facebook “Gazeta Plisi” ka publikuar më 3 gusht një përmbajtje me pretendimin “Bedri Hamza i përgjigjet Kryeministrit Albin Kurtit, refuzon krijimin e institucioneve parapelqejnë zgjedhjet e reja”.
Në këtë postim, faqja ka bashkëngjitur edhe letrën zyrtare, përmes së cilës kryetari i Partisë Demokratike të Kosovës (PDK), Bedri Hamza e ka refuzuar ftesën e kryeministrit në detyrë, Albin Kurti për takim.
Çka nuk shkon me këtë postim?
Pas verifikimit të fakteve, u vërtetua se mbishkrimi i këtij postimi nuk përputhet me përmbajtjen e letrës zyrtare.
FAKTET
Përmes mbishkrimit, “Gazeta Plisi” pretendon se PDK-ja përmes kësaj letre ka refuzuar krijimin e institucioneve, pasi parapëlqen zgjedhje të reja.
Mirëpo, në letrën që e ka siguruar “Gazeta Express”, Hamza i ka shkruar Kurtit se PDK-ja do të vazhdojë të qëndrojë në opozitë.
“I nderuar Kryeministër në detyrë, z. Albin Kurti, Ju falënderoj për ftesën për takim. Duke iu referuar takimit tonë të datës 10 korrik 2026 dhe qëndrimit publik të PDK-së, ju rikonfirmoj se, në rrethanat aktuale, qëndrimi ynë është që të vazhdojmë të qëndrojmë në opozitë”, shkroi ai në letër.
Gjithashtu, përmes kësaj letre, ai shprehet se pret që partitë parlamentare të arrijnë marrëveshje për krijimin e institucioneve të reja.
“Presim që ju, në përputhje me përgjegjësitë që ju burojnë nga zgjedhjet e 7 qershorit 2026, së bashku me partitë e tjera të përfaqësuara në Kuvendin e Kosovës, të arrini marrëveshje për krijimin e institucioneve të reja të vendit. Me respekt, Bedri Hamza; Kryetar i Partisë Demokratike të Kosovës”, shkroi ai.
Pra, në këtë letër nuk përmenden në asnjë rast “refuzimi i krijimit të institucioneve” apo “zgjedhjet e reja si zgjidhje e preferuar”, siç pretendohet në përmbajtjen e faqes “Gazeta Plisi”.
Analiza
Pretendimi se Bedri Hamza ka refuzuar krijimin e institucioneve të reja dhe ka deklaruar se PDK-ja parapëlqen zgjedhjet e reja, nuk është i saktë.
Në përgjigjen zyrtare ndaj ftesës së Kurtit, Hamza ka deklaruar se PDK-ja do të vazhdojë të qëndrojë në opozitë, ndërsa është shprehur se pret që partitë e përfaqësuara në Kuvend të arrijnë marrëveshje për krijimin e institucioneve të reja.
Bazuar në metodologjinë e punës, hibrid.info e vlerëson përmbajtjen e publikuar nga “Gazeta Plisi” si “manipulim i fakteve”.
Arsyetimi
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.