Shkroi: Fatbardh Dema
Faqja në Facebook “Universal” ka publikuar të martën (18 nëntor) një postim në të cilin shfaqet futbollisti me prejardhje nga Kosova, Granit Xhaka, i cili mbron ngjyrat e kombëtares së Zvicrës në futboll.
Këtij imazhi i është vënë mbishkrimi: “Fishëllimat i kisha kuptu vetëm nga tifozët serb, por jo nga Dardanët”. Ndërsa në përshkrim të postimit shkruan “Krenaria e shqiptarëve GRANIT XHAKA”.
E vërteta?
Pas verifikimit të fakteve të kryer nga hibrid.info, u vërtetua se Xhaka nuk ka dhënë një deklaratë të tillë.
Hibrid.info ka hulumtuar përmes Google me fjalët kyçe “Xhaka: Fishkëllimat i kisha kuptuar vetëm nga tifozët serb, por jo nga Dardanët”, mirëpo rezultatet nuk shfaqin asnjë informacion të tillë të publikuar në media kredibile. (shih këtu)
Me 18 nëntor u zhvillua ndeshja Kosovë – Zvicër, në kuadër të Grupit B për eliminatoret për Kampionatin Botëror të vitit 2026, e cila përfundoi me rezultat të barabartë 1:1.
Në media u raportua se tifozët kosovarë gjatë ndeshjes kishin fishkëllyer në drejtim të Xhakës, dhe për këtë ngjarje foli edhe vetë futbollisti.
Pas ndeshjes, Xhaka u prononcua për mediumin zviceran “SRF”, ku tha se nuk e kishte pritur një gjë të tillë, por se është pjesë e lojës.
“Fishkëllimat janë gjëja e fundit që prisja, veçanërisht këtu në shtëpi. Më dhemb, për të qenë i sinqertë. Por duhet ta pranoj. Nuk e prisja, por është pjesë e lojës. Gjithçka është në rregull”, tha Xhaka për SRF, raporton Blick.ch.
Pra, në asnjë rast Xhaka nuk është shprehur ashtu siç u pretendua nga faqja “Universal” në Facebook.
Deri në shkrimin e këtij artikulli, postimi nga faqja “Universal” ka marrë 67 reagime, 18 komente dhe 6 shpërndarje. (këtu)
Analiza
Faqja “Universal” në Facebook publikoi një imazh të Granit Xhakës, duke pretenduar se ai ka thënë se “Fishëllimat i kisha kuptuar vetëm nga tifozët serb, por jo nga Dardanët”.
Pas verifikimit nga hibrid.info vërtetohet se një deklaratë e tillë nuk ekziston. Kërkimet online me fjalët kyçe të citimit të pretenduar nuk japin asnjë burim kredibil që e mbështet atë.
Pas ndeshjes Kosovë – Zvicër, Xhaka foli për mediumin zviceran SRF, ku tha se fishkëllimat e habitën dhe e prekën, por se ato janë pjesë e lojës dhe se gjithçka është në rregull.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
