Portali i dyshimtë “promakale.com” ka publikuar një artikull me titull “Shokohet Kosova, Nderron Jete Kryetari I PDK/Se”.
Pas kontrollit dhe verifikimit të fakteve nga hibrid.info, rezulton se artikulli në fjalë përmban titull të modifikuar, duke qenë se në përmbajtje jepet lajmi për vdekjen e Ferki Pecit, i cili ishte kryetar i nëndegës së PDK-së në “Ura e Gjakut” në Mitrovicë.
Me këtë titull, ky portal i dyshimtë, ka lënë të kuptohet se bëhet fjalë për kryetarin e Partisë Demokratike të Kosovës, post të cilin e mban Enver Hoxhaj si ushtrues detyre, pas dorëheqjes së Kadri Veselit.
Teksti i artikullit të publikuar në “promakale.com”:
Shokohet Kosova, Nderron Jete Kryetari I PDK/Se
Vdes në moshë të re, kryetari i një nëndege të PDK-së. Ka vdekur sot në moshë të re, Ferki Peci Rahova, kryetar i nëndegës së PDK-së në “Ura e Gjakut” në Mitrovicë.K liko reklamen dhe shiko videon e ketij shkrimi. Lajmin për vdekjen e tij e ka bërë dega e kësaj partie në Mitrovicë. PDK-ja e Mitrovicës i ka dërguar ngushëllime familjes dhe shoqërisë. K liko reklamen dhe shiko videon e ketij shkrimi
Vegëza e artikullit të publikuar në “promakale.com”:
Më poshtë mund të gjeni artikullin autentik të publikuar në disa media:
Analiza:
Portali i dyshimtë “promakale.com” ka përdorur lajmin për vdekjen e kryetarit të nëndegës së PDK-së në “Ura e Gjakut” në Mitrovicë, duke i vënë titull të sajuar, për të pretenduar të duket se lajmi ka të bëjë me kryetarin e PDK-së. Pas analizës së kontrollit të fakteve nga hibrid.info, ky artikulli në fjalë vlerësohet si “dezinformatë” dhe “clickbait”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Vlerësimin si “Clickbait” e marrin ato tekste titulli i të cilave nuk ka asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.