Llogaria në TikTok me emrin “lagraqsaqi” ka publikuar një video-material me imazhin e Arben Gashit, deputet i Kuvendit të Kosovës nga radhët e LDK-së dhe një mbishkrim si deklaratë e tij.
Në mbishkrim pretendohet se Gashi është deklaruar se do ta votonte Listën Serbe para Lëvizjes Vetëvendosje.
Hibrid.info ka hulumtuar dhe nuk ka gjetur dëshmi që provojnë se një deklaratë e tillë është bërë nga deputeti Gashi.
Vegëza e video-materialit të publikuar në TikTok nga “lagraqsaqi”:
https://www.tiktok.com/@lagraqsaqi/video/7269722046286925088
Hibrid.info e ka gjetur po ashtu të njëjtin deklarim të pretenduar, të publikuar nga dy faqe në Facebook. (shih këtu dhe këtu)
Megjithatë, hibrid.info ka hulumtuar me anë të makinës së kërkimit “Google”, për të gjetur prova që faktojnë deklarimin e pretenduar të Arben Gashit, nga faqja në fjalë, por që nuk ka hasur në të tilla. (shih këtu)
Përpos faktit që publikimin e pretenduar nuk e gjejmë në asnjërin nga mediat kredibile, fakt tjetër që e bën jo të qëndrueshëm pretendimin, është edhe të shkruarit me gabime drejtshkrimore i mbishkrimit në imazh.
Mbishkrimi origjinal i video-materialit:
“Gashi po ta kisha lapsin e popllit në dorë më parë dota votoja Listen Serbe sesa VV-në”
Analiza:
Llogaria në TikTok “lagraqsaqi” ka postuar një video-material me datë 21 gusht.
Video-materiali shfaq imazhin e deputetit Arben Gashi me mbishkrimin që pretendon se ai ka thënë se më parë do të votonte Listën Serbe sesa Lëvizjen Vetëvendosje.
Por që hibrid.info ka hulumtuar dhe nuk ka arritur të gjejë të publikuar nga burime të besueshme deklaratën e pretenduar.
Andaj edhe bazuar në metodologjinë e punës, hibrid.info e vlerëson video-materialin e publikuar si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.