Portali i dyshimtë “Specialja.com” ka publikuar artikullin me titull “Ky është shteti shumë i fuqishëm që sapo dha njohjen e shtetit të Kosovës, urime!”.
Titulli i këtij artikulli nuk përputhet me tekstin, pasi në përmbajtje shihet se është publikuar vetëm një pjesë e intervistës së zëvendësministrit të jashtëm të Ukrainës, Vasyl Bodnar, e realizuar në televizionin shqiptar, RTV Ora.
Gjithashtu shihet se Bodnar, gjatë kësaj interviste, të mos e ketë përmendur asnjëherë njohjen e menjëhershme të Kosovës nga shteti të cilin e përfaqëson. I gjitha çfarë ka përmendur ky zyrtar i lartë ukrainas, ishte vetëm mundësia që Kosova të njihet nga Kievi zyrtar, duke shtuar se kjo procedurë ende është në hapat e parë.
Teksti origjinal i publikuar në portalin Specialja.com:
Ky është shteti shumë i fuqishëm që sapo dha njohjen e shtetit të Kosovës, urime!
Zv.ministri i jashtëm Ukrainas, Vasyl Bodnar, në një interviste në RTV Ora, paral ajmëroi një njohje të mundshme të shtetit të Kosovës nga Kievi zyrtar.
Sipas diplomatit ukrianas, nuk duhet të bëhen paralelizime mes Kosovës dhe Kr imesë pasi sipas tij, janë dy gjëra krejt të ndryshme nga njëra-tjetra. / Ju ftojmë që ta hapni marketingun për 5 sekonda dhe shfaqen pamjet ekskluzive!
Intervista e plotë e Bodnar dhënë për RTV Ora:
Analiza:
Titulli i artikullit të botuar në Specialja.com është i rremë dhe nuk përputhet me përmbajtjen. Ky tekst hyn në kategorinë “Clickbait”, si dhe “Dezinformatë”, pasi që pretendohet të paraqitet diçka që, në fakt, nuk është thënë nga zv. ministri Bodnar.
Arsyetimi:
Clickbait
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
Dezinformata
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.