Mediumi online në gjuhën shqipe “gazetadita.al” ka publikuar dje (29 shtator) një artikull me titull: “FOTO: Në varrim me tre fotografi, por të vrarët në Banjskë ishin katër. Ja kush është dhe pse e fshehin të katërtin”.
Gazeta në fjalë pretendon se janë vrarë katër sulmues serb gjatë sulmit ndaj Policisë së Kosovës më 24 shtator në Banjskë të Zveçanit, por identiteti i njërit (Bojan Mijailović), sipas këtij portali po fshihet për shkak se ishte ish-truproja e shefit të BIA-s serbe, Aleksandar Vulin.
Pas hulumtimit të fakteve dihet se tre sulmues serb janë vrarë në operacionin e Banjskës, dhe nuk është fshehur identiteti i Bojan Mijailović në ceremoninë e ndezjes së qirinjve në veri të Mitrovicës që u organizua nga Lista Serbe për tre të vrarët.
Vegëza e artikullit të publikuar në “gazetadita.al”:
E përditshmja shqiptare, duke publikuar fotografi nga dita e ceremonisë së ndezjes së qirinjve (e jo varrimit) të organizuar për të sulmuesit e vrarë, pretendon se shihen vetëm fotografitë e tre të vrarëve, ndërsa identiteti i të vrarit të katërt (Bojan Mijailović) fshihet.
Bazuar në të dhënat e publikuara nga ministri i Punëve të Brendshme, Xhelal Sveçla bëhet e ditur se tre sulmues janë vrarë. (këtu)
Po ashtu, pretendimi i gazetës se në ceremoninë e ndezjes së qirinjve, e që gazeta i referohet “varrim” në titull, sipas tyre, mungon fotografia e të vrarit të katërt, Bojan Mijailović.
Në fakt, identitetit i Bojan Mijailović, ish—truprojës së shefit të BIA-së serb, Aleksandar Vulin, është bërë i ditur nga ministri Sveçla. (këtu)
Bazuar në dokumentin e shpërndarë nga Sveçla ku shihet edhe fytyra e Bojan Mijailović, atëherë në fotografitë e sulmuesve të vrarë të shpalosura në ceremoninë e ndezjes së qirinjve figuron edhe ajo e Bojan Mijailović.
Analiza:
E përditshmja shqiptare “gazetadita.al” ka hedhur pretendimin se janë vrarë katër sulmues serb gjatë sulmit ndaj Policisë së Kosovës më 24 shtator në Banjskë të Zveçanit, ku identiteti i Bojan Mijailović fshihet, pasi që nuk u shpalos fotografia e tij në ceremoninë e ndezjes së qirinjve të organizuar për ta.
Faktet tregojnë se janë vrarë tre sulmues serb, dhe se fotografia e Bojan Mijailović, zë vend në ceremoninë e ndezjes së qirinjve.
Bazuar në metodologjinë e punës, hibrid.info, këtë pretendim e vlerëson si “përmbajtje e paverifikuar”.
Vlerësimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
