Mediumi serb “Novosti.rs” ka publikuar dje (19 shtator) një artikull me titull “Shteti i rremë po luan me zjarrin: Synimet e përgjakshme të ashtuquajturës Kosovë dhe lavdërimet e paktit kriminal të NATO-së”.
Ky pretendim i bërë përmes titullit nga mediumi në gjuhën serbe, bëhet përmes një interpretimi të pabazë të përmbajtjes së një postimi të ministrit të Mbrojtës së Kosovës, Armend Mehaj, lidhur me qëllimin për anëtarësim në NATO.
Pra qëllimin e Kosovës për anëtarësim në NATO i shprehur nga ministri Mehaj, e përditshmja serbe në titull e interpreton si synim të përgjakshëm të Kosovës dhe NATO-në e konsideron si pakt kriminal.
Vegëza e artikullit të publikuar në “Novosti.rs”:
Pjesë të artikullit të publikuar në “Novosti.rs”:
Ministri i Vetëshpallur i mbrojtjes së shtetit të rremë të Kosovës, Armend Mehaj, ka thënë se qëllimi i radhës është Anëtarësimi i Kosovës në NATO.
Destinacioni ynë është anëtarësimi në aleancën më të madhe që garanton paqen dhe stabilitetin, NATO është vendtakim dhe vazhdimi i misioneve të përbashkëta me vendet partnere – tha Mehaj.
Edhe pse në përmbajtje të artikullit citohet ministri Mehaj, përmes titullit, ky medium në gjuhen serbe, pretendon diçka tjetër, por në mënyrë të pabazuar.
Për më tepër Mehaj, në postimin e tij në Facebook thekson se është ngritur një ushtri profesionale dhe se synimi është mbrojtja e shtetit të Kosovës nga çdo rrezik dhe kërcënim, si dhe anëtarësimi në NATO.
Vegëza e deklaratës së ministrit Mehaj:
Pjesë të deklaratës së ministrit Mehaj në Facebook:
23 vite nga kur trupat të cilët ishin përgjegjëse për ndalimin dhe zvogëlimin e dëmeve nga katastrofat natyrore janë shndërruar në ushtri të ngritur profesionalisht, e të gatshme në aspektin operacional t’i dalin në ndihmë qytetarëve të vet jo vetëm në rast të katastrofave natyrore por edhe ta mbrojnë çdo pëllëmbë të Republikës së Kosovës, shtetësisë së atdheut tonë ndaj çdo rreziku e kërcënimi.
Destinacioni ynë është anëtarësimi në aleancën më të madhe që siguron paqen e stabilitetin, NATO është vendtakimi e pikëvazhdimi i misioneve të përbashkëta me shtetet partnere.
Interpretimi i këtij mediumi shkon edhe më tej. Përmes titullit, pretendohet se NATO është një pakt kriminal. Në fakt misioni i kësaj aleance është i kundërt me atë që e pretendon “Novosti.rs”. Në bazë të traktatit të njohur si “Traktati i Uashingtonit” apo “Traktati i Atlantikut të Veriut” e që është akti themelues i NATO-s, thuhet se misioni i kësaj aleance është sigurimi i paqes dhe stabilitetit. (këtu)
Analiza:
Mediumi serb “Novosti” deklaratën e ministrit të mbrojtjes së Kosovës, Armend Mehaj, për anëtarësim në aleancën e NATO-së e interpreton në mënyrë tendencioze dhe të pabazë si synim të përgjakshëm të shtetit të Kosovës.
E përditshmja, NATO-n e quan pa fakte konkrete si pakt kriminal.
Në bazë të metodologjisë së punës, hibrid.info vlerëson se pretendimet e gazetës serbe janë të pabaza dhe klasifikohen si “Teori konspirative”.
Vlerësimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
