Shkroi: Etrit Rexhepi
Publikohet një imazh ku shfaqet Rifat Jashari, vëllai i Adem Jasharit, komandantit dhe themeluesit të Ushtrisë Çlirimtare të Kosovës (UÇK), me mbishkrimin që pretendon se ai ka deklaruar se “PDK-ja (Partia Demokratike e Kosovës) nuk e dha asnjë cent për Drenicën, sheshin e ndërtoi KFOR-i, Prekazin e ndërtoi Turqia, ndërsa Kosovën Ibrahim Rugova”.
Kjo përmbajtje me këtë pretendim është publikuar të hënën (18 gusht) nga një llogari në TikTok, me emrin “ffrmir”.
E vërteta?
Hibrid.info nuk ka gjetur asnjë burim që do të konfirmonte pretendimin në fjalë.
Hibrid.info nuk ka gjetur asnjë llogari të Rifat Jashari në rrjetet sociale, ku do të mund të hulumtohej për deklarata të tij.
Por, hibrid.info ka kontrolluar me anë të makinës së kërkimit “Google”, nëse deklarata e pretenduar është publikuar në media të besueshme, por një gjë e tillë nuk është hasur (shih këtu).
Hibrid.info gjithashtu kontrolloi YouTube për të gjetur video që mund të vërtetonin deklaratën e pretenduar, por nuk gjeti asnjë (shih këtu).
Kjo përmbajtje, deri në publikimin e këtij artikulli ka arritur të grumbullojë afër 27 mijë shikime, e mbi 500 reagime.
Analiza:
Pretendimi se Rifat Jashari ka deklaruar se “PDK-ja nuk e dha asnjë cent për Drenicën, sheshin e ndërtoi KFOR-i, Prekazin e ndërtoi Turqia, ndërsa Kosovën Ibrahim Rugova” nuk qëndron.
Hibrid.info nuk ka gjetur asnjë burim, video apo publikim të besueshëm që ta konfirmojë këtë deklaratë.
Bazuar në metodologjinë e punës, hibrid.info e vlerëson pretendimin si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.