Artikulli me titull “Për inati të Vuçiqit dhe Ramës sonte e njohu si shtet Kosovën”, është publikuar nga portali i dyshimtë me përmbajtje në gjuhën shqipe “news426media.com”.
Pas verifikimit të fakteve, hibrid.info ka vërtetuar se titulli i këtij artikulli është i rremë, i cili nuk i përgjigjet përmbajtjes.
Kjo është vërtetuar, pasi në përmbajtje gjendet lajm i vjetër, i cili është publikuar më 21 dhjetor të vitit 2019. Atëkohë, anëtari i presidencës së Bosnje e Hercegovinës (BeH), Zheljko Komshiq, në një intervistë dhënë Radio Televizionit të Kosovës (RTK) kishte thënë se, pavarësisht vendimit për njohje nga BeH, Pavarësia e Kosovës është fakt i kryer.
Pra, lajmi është i vjetër i cili nuk ndërlidhet me kryeministrin e Shqipërisë Edi Rama, e as me presidentit serb Aleksandër Vuçiq, siç pretendohet rrejshëm në titull.
Gjithashtu, në titull pretendohet rrejshëm se një shtet ka njohur Pavarësinë e Kosovën.
Vegëza e artikullit të publikuar në portalin e dyshimtë “news426media.com”:
Artikulli me titull të rremë është shpërndarë edhe në rrjetin social Facebook nga faqja “KOHA E RE”, e cila numëron afër 7 mijë ndjekës. (shih këtu)
Gjatë hulumtimit përmes makinave online të kërkimit, hibrid.info ka arritur të gjejë artikullin autentik të publikuar në kohë reale (21 dhjetor 2021) në portalin e RTK-së, ku gjendet intervista e anëtarit të presidencës së Bosnje Hercegovinës, Zheljko Komshiq. (shih këtu)
Analiza:
Portali i dyshimtë “news426media.com” ka publikuar një intervistë të vjetër të vitit 2019, atëkohë kur anëtari i presidencës së Bosnje Hercegovinës, Zheljko Komshiq, kishte deklaruar se për të Kosova është shtet i pavarur.
Ky portal i dyshimtë, këtë artikull është munduar ta paraqesë si aktual, duke i vënë titull të rremë se për inat të Vuçiqit dhe Ramës, një shtet ka njohur Kosovën si të pavarur.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
