Shkroi: Etrit Rexhepi
Është publikuar një artikull që ka raportuar për vërshime në Prishtinë.
Lajmi është publikuar sot (20 maj) nga “albinfo.ch”, portal në gjuhën shqipe, që operon në Zvicër.
Por, pas kontrollit nga hibrid.info, është gjetur se imazhi me anë të së cilit është paraqitur lajmi, nuk shfaq pamje nga Prishtina.
Bazuar në rëndësinë që paraqet fotografia në tekstet e gazetarisë digjitale (shih këtu), hibrid.info vlerëson se në këtë rast, audienca mund ta marrë si të saktë fotografinë e paraqitur në këtë artikull.
Vegëza e artikullit të publikuar nga portali “albinfo.ch”:
Nga përmbajtja e artikulit, kuptohet se portali në fjalë, i është referuar një artikulli, të publikuar në “koha.net”, të cilin hibrid.info e ka gjetur përmes makinave të kërkimit (shih këtu).
Derisa informacioni i paraqitur në tekst, është i konfirmuar, hibrid.info ka vërtetuar se fotografia, që shfaq pamjet e vërshimeve në këtë artikull, nuk tregon momentet kur kjo ngjarje ka ndodhur në Prishtinë.
Pas hulumtimit nga hibrid.info, në bazë të një artikull i publikuar në vitin 2017, nga portali “klankosova.tv”, është vërtetuar se imazhi në fjalë shfaq momentet e përmbytjeve në qytetin e Shkodrës, në Shqipëri (shih këtu).
Analiza:
Fotografia me anë të së cilës është paraqitur lajmi për vërshimet në Prishtinë, nuk është e saktë.
Gjetjet nga hibrid.info tregojnë se imazhi i paraqitur në artikullin e portalit “albinfo.ch”, shfaq pamje nga qyteti i Shkodrës, gjatë përmbytjeve.
Bazuar në metodologjinë e punës, hibrid.info e vlerëson këtë përmbajtje si “Gabim”.
Arsyetimi:
Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.