Shkroi: Etrit Rexhepi
Është publikuar një video në TikTok, në të cilën shihet kryetari i Lëvizjes Vetëvendosje, Albin Kurti, gjatë tubimit të partisë së tij në Suharekë, ndërsa dëgjohen thirrjet “UÇK” dhe “Hashim Thaçi”.
Pretendimi u publikua më 29 janar nga llogaria “partiademokratike_131”. “Gjate fjalimit te Kurtit ketu deshton LEVIZJA VETEVENDOSJE, nje shumice simpatizantësh qe ishin ne tubim brohorisnin si; UQK, HASHIM THAQI”, është mbishkrimi i vendosur në video.
E vërteta?
Pas kontrollit të fakteve nga hibrid.info, është vërtetuar se ka pasur ndërhyrje në video-materialin origjinal, të cilit i është mbivendosur audioja me brohoritjet “UÇK” dhe “Hashim Thaçi”, me pretendimin se ishin brohoritje të simpatizantëve në Suharekë, në tubimin e VV-së gjatë fushatës për zgjedhjet parlamentare të 9 shkurtit.
Hibrid.info ka gjetur materialin origjinal, i publikuar në faqen e Albin Kurtit në Facebook më 28 janar. (shih këtu 23:30 – 24:15) Në materialin origjinal vërehet se dëgjohet vetëm zëri i Kurtit, ndërsa në publikimin në TikTok janë shtuar thirrjet e pretenduara.
Publikimi ka marrë më shumë se 10 mijë shikime, 349 pëlqime dhe 64 komente deri në momentin e trajtimit. Në bazë të disa komenteve, vërehet se përmbajtja është pranuar si e vërtetë.
Pak kontekst:
Në mbrëmjen e 27 janarit, disa qytetarë kanë protestuar para ambienteve ku ishte planifikuar mbajtja e tubimit të Lëvizjes Vetëvendosje dhe kryetarit të saj Albin Kurti në Skenderaj. Një nga brohoritjet ishte “Thaçi, Thaçi” referuar ish-presidentit dhe ish-kryetarit të Partisë Demokratike të Kosovës, që ka qenë tradicionalisht në krye të kësaj komune. Sipas pamjeve të publikuara online, Policia ka ndërhyrë ndaj aksionit të protestuesve. (shih këtu)
Analiza:
Në një video të publikuar në TikTok është pretenduar se gjatë fjalimit të kryetarit të Lëvizjes Vetëvendosje, Albin Kurti, në tubimin zgjedhor në Suharekë, ka pasur thirrje “UÇK” dhe “Hashim Thaçi” gjatë fjalimit të tij.
Megjithatë, pas verifikimit të fakteve nga hibrid.info del se videoja është e manipuluar. Në videon origjinale s’ka pasur brohoritje të tilla nga simpatizantët në tubim.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.