Shkroi: Etrit Rexhepi
Publikohet një fotografi ku shfaqet Ramush Haradinaj, kryetar i Aleancës për Ardhmërinë e Kosovës (AAK), me mbishkrimin që pretendon se ai ka akuzuar Albin Kurtin dhe shërbimet serbe se kanë ndërhyrë gjatë fushatës në Maqedoninë e Veriut për ta larguar nga skena politike themeluesin e UÇK-së, Ali Ahmeti.
Kjo përmbajtje është publikuar të hënën (20 tetor) në Facebook nga një llogari me emrin “Lajme Nga Bota”.
Cila është e vërteta?
Hibrid.info nuk ka identifikuar asnjë burim që të konfirmojë se Haradinaj ka bërë publikisht një deklaratë të tillë.
Në bazë të përmbajtjes së komenteve që janë bërë në këtë postim, mund të vlerësohet se lexuesit mund ta marrin si të vërtetë këtë pretendim.
Hibrid.info ka hulumtuar në publikimet e ditëve të fundit në llogarinë e Haradinajt në Facebook, por nuk ka gjetur postime nga ai, ku do të mund të konfirmohej deklarata e pretenduar (shih këtu).
Kërkimi për këtë pretendim u realizua edhe me anë të makinës së kërkimit, “Google”. Nga rezultatet e kërkimit nuk u shfaq asnjë burim kredibil që do ta vërtetonte se Haradinaj ka bërë një deklaratë të tillë (shih këtu).
Hibrid.info gjeti një artikull të publikuar në shkurt të 2024, ku Haradinaj kishte komentuar mbështetjen që Lëvizja Vetëvendosje (LVV) i kishte ofruar koalicionit VLEN në zgjedhjet parlamentare në Maqedoninë e Veriut, duke e cilësuar atë si “ndërhyrje dhe shërbim ndaj agjendës ruse dhe serbe”. Ai kishte thënë se veprimet e Kurtit rrezikonin stabilitetin në Ballkan dhe legjitimonin ndërhyrjen e liderëve të tjerë në punët e brendshme të shteteve fqinje (shih këtu).
Analiza:
Pretendimi se Ramush Haradinaj ka akuzuar Albin Kurtin dhe shërbimet serbe për ndërhyrje në fushatën në Maqedoninë e Veriut me qëllim largimin e Ali Ahmetit nga skena politike nuk qëndron.
Hibrid.info nuk ka gjetur asnjë deklaratë të tillë nga Haradinaj në faqet e tij zyrtare apo në media kredibile, ndërsa deklaratat e tij publike flasin vetëm për “ndërhyrjen” e LVV-së në zgjedhjet parlamentare (2024) në Maqedoninë e Veriut, pa përmendur largimin e Ali Ahmetit.
Andaj, bazuar në metodologjinë e punës, hibrid.info e vlerëson përmbajtjen si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.