Shkroi: Festim Rizanaj
Të shtunën, më 14 qershor, llogaria në Facebook “Investiguesi Shkrimor” publikoi një imazh ku shfaqen gjurmë të një shpërthimi dhe zjarri mes ndërtesave të larta, duke e shoqëruar me përshkrimin: “Tel Aviv: pamje nga nata e mbrëmshme”.
Çka gjeti hibrid.info?
Pas verifikimit të fakteve, hibrid.info vërtetoi se imazhi nuk është autentik, por është gjeneruar me ndihmën e inteligjencës artificiale.
Gjatë kërkimit të kundërt të imazhit të publikuar nga llogaria “Investiguesi Shkrimor”, u konstatua se asnjë burim i besueshëm nuk e kishte shpërndarë apo raportuar këtë imazh.
Ky imazh është shpërndarë gjerësisht nga një sërë faqesh dhe llogarish në media sociale, të cilat nuk konsiderohen burime të besueshme apo profesionale të informacionit. (këtu)
Më pas, imazhi u analizua përmes detektorit të përmbajtjes së gjeneruar nga inteligjenca artificiale të platformës online Illuminarty. Sipas vlerësimit të këtij mjeti, me një probabilitet prej 88.3%, imazhi “ka gjasa të përmbajë elemente të krijuara nga inteligjenca artificiale ose të jetë një përmbajtje e rreme”. Ky rezultat përforcon dyshimet mbi autenticitetin e imazhit dhe sugjeron se ai është manipuluar ose prodhuar artificialisht me qëllim dezinformimi.
Imazhi u analizua gjithashtu përmes një tjetër platforme të specializuar për verifikimin e përmbajtjeve të krijuara me inteligjencë artificiale “sightengine.com”, e cila vlerësoi me një probabilitet prej 82% se imazhi është gjeneruar nga inteligjenca artificiale. Ky vlerësim përforcon më tej dyshimet mbi origjinën joautentike të imazhit.
Analiza:
Më 14 qershor, llogaria “Investiguesi Shkrimor” në Facebook publikoi një imazh që paraqet gjurmë shpërthimi dhe zjarri mes ndërtesave të larta, duke pretenduar se bëhet fjalë për pamje nga nata e kaluar në Tel Aviv.
Megjithatë, pas një procesi të verifikimit të fakteve, hibrid.info arriti në përfundimin se imazhi nuk është i vërtetë, por është krijuar përmes mjeteve të inteligjencës artificiale.
Bazuar në metodologjinë e punës së saj, hibrid.info e klasifikon këtë imazh si “mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.