Portali i dyshimtë “abandoned-news.com” që ka përmbajtje në gjuhën shqipe, ka publikuar një artikull me titull të sajuar “Përhajr na qoftë: Kroacia i detyroi 5 shtete që ta njohin Kosovën”.
Titulli i këtij artikull rezulton të jetë i rremë. Një gjë e tillë u vërtetua nga hulumtimi i bërë nga ekipi i hibrid.info, pas analizës së fakteve të kontrolluara.
Përpos titullit që është i sajuar, në përmbajtje të artikullit është vendosur një lajm i vërtetë, i publikuar në mediat online në gjuhën shqipe, ku paraqet fjalimin e ministrit të jashtëm kroat, Gordan Grlic Radman, të bërë gjatë forumit “GLOBSEC” (Bratislava Global Security Forum) të mbajtur më 16 qershor.
Radman, në fakt, kishte deklaruar se po kërkon nga 5 shtetet anëtare të BE-së që nuk e kanë njohur Kosovën, që ta bëjnë një gjë të tillë, por jo edhe t’i detyrojë ato, siç pretendohet në titullin e artikullit të “abandoned-news.com”.
Vegëza e artikullit me titull të rremë i publikuar nga “abandoned-news.com”:
Ministri i jashtëm i Kroacia, vend ky që mbanë presidencën e radhës gjashtëmujore në BE, ka deklaruar se do të angazhohet që, brenda këtyre muajve, të shfrytëzojë rastin që të kërkojë nga 5 shtetet, anëtare të BE-së, ta njohin pavarësinë e Kosovës. Ai këto pohime i kishte bërë gjatë forumit “GLOBSEC”.
Vegëzat e mediave që kanë publikuar pjesë të fjalimit të ministrit korat Gordan Grlic Radman:
https://vijesti.hrt.hr/eu/grlic-radman-pozvao-posljednje-clanice-eu-a-da-priznaju-kosovo-2103834
https://sinjali.com/kryediplomati-kroat-kroacia-u-kerkon-5-anetareve-te-be-se-ta-njohin-kosoven/
Analiza:
Pretendimi i bërë në përmes titullit të “abandoned-neës.com”, rezulton të jetë i rremë, pasi që Kroacia nuk ka detyruar 5 shtetet anëtare të BE-së ta njohin Kosovën. Në fakt, autori i artikullit (abandoned-neës.com) ka përdorur lajmin e 16 qershorit, për të krijuar titull të rremë.
Ky portal i dyshimtë e ka shpërndarë këtë artikull me titull të sajuar në një faqe të Facebook-ut (Gazeta Aktive) që ka numër të madh të ndjekësve, për të rritur trafikun dhe, si rezultat i kësaj, është arritur edhe efekti negativ, dezinformimi i lexuesve.
Për këtë arsye, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
