Portali i dyshimtë “Valetal.info” ka publikuar një artikull me titull “Merret vendim zyrtar, në këtë datë do të hapen të gjithë kufijtë e Evropës dhe Ballkanit”.
Titulli i këtij artikulli del të jetë i sajuar, pasi që nuk përputhet me tekstin, duke qenë se në përmbajtjen e tij trajtohet vetëm mbyllja e kufirit mes Shqipërisë dhe Greqisë.
Teksti origjinal i publikuar në Valetal.info:
T:Mirret vendim zyrtar në këtë datë do të hapen të gjitha kufijtë e Europës dhe Ballkanit
Në vendimin e bërë sot në fletoren zyrtare,Athina lë të pandryshuar gjendjen ne lidhje me kufirin shqiptaro – grek.Pra deri në datën 30 shtator ,nuk lejohen të hyjnë turistët nga Shqipëria. Në pikat kufitare të Kapshtices dhe Kakavijës, do të lejohen përkatësisht 750 në Kakavijë dhe 300 në Kapshticë.
Do te lejohet të kalojnë vetëm shtetasit grekë dhe ata shqiptarë me leje qëndrimi në Greqi si dhe shtetasit shqiptarë që janë me punë sezonale në Greqi. / Ju ftojmë që të hapni marketingun për 5 sekonda dhe shfaqen pamjet ekskluzive!
Vegëza e artikullit të publikuar në Valetal.info:
https://valetal.info/hs/?p=7366&fbclid=IwAR3Zdu6cDRlWetXxcbcb9I8MzB3r21a2BHZNd1w3QK5Z0zb-Db_ER2fGBXI
Analiza:
Ky lajm posedon titull të rremë që nuk përkon me përmbajtjen e tekstit dhe kategorizohet si “Lajm i rremë”, “Dezinformatë” dhe “Clickbait”.
Arsyetimi:
Lajm i rremë – Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.