Portali i dyshimtë me përmbajtje në gjuhën shqipe “news426media.com” ka publikuar dje (6 tetor) një artikull me titull “CIA bën paralajmërimin e fortë: Edhe pak orë Kievi do të goditet nga një …”.
Pas verifikimit të fakteve dhe hulumtimit të kryer përmes makinave online të kërkimit, hibrid.info ka vërtetuar se ky portal ka publikuar artikull me lajm të vjetër, i muajit mars të këtij viti, me pretendimin ta paraqes atë si aktual.
Gjatë hulumtimit, hibrid.info ka arritur të gjejë këtë artikull të publikuar në kohë reale (10 mars) në disa media online në gjuhën shqipe.
Pra, paralajmërimi nga CIA për goditje të Kievit nga forcat ruse nuk është aktual, siç është munduar të paraqitet nga portal i dyshimtë “news426media.com”.
Vegëza e artikullit të publikuar në portalin e dyshimtë “news426media.com”:
Pjesë nga artikulli i publikuar në portalin e dyshimtë “news426media.com”:
Sipas CIA-s, Kievi mund të jetë vetëm disa orë larg një sulmi “të tmerrshëm” rus, pasi zyrtarët perëndimorë paralajmërojnë se forcat e Putinit po “shtrëngojnë lakun” rreth kryeqytetit ukrainas.
Megjithëse një autokolonë masive ruse që shtrihet 40 milje në veri të kryeqytetit po i ngjan shpejt një bllokimi trafiku, zyrtarët perëndimorë kanë frikë se plani i dyshuar i Moskës për të pushtuar qytetin dhe për të rrëzuar presidentin ukrainas, definitivisht nuk ka përfunduar.
Ky artikull është shpërndarë sot (7 tetor) edhe në Facebook nga faqja “KOHA E RE”, e cila numëron afër 7 mijë ndjekës. (shih këtu)
Hibrid.info ka arritur të gjejë lajmin autentik të publikuar më 10 mars në mediumet online në gjuhën shqipe “TopChannel.tv” dhe “Paparaci.com”.
Analiza:
Portali i dyshimtë “news426media.com” ka publikuar një artikull të vjetër të muajit mars, i cili kishte të bëjë me paralajmërimin e CIA-s se Kievi mund të goditej nga një sulm “i tmerrshëm” rus.
Këtë artikull të vjetër, ky portal i dyshimtë është munduar ta paraqesë si aktual. Bazuar në metodologjinë e punës, hibrid.info e vlerëson si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.